Ka jingkiew ba la ïoh haduh mynta ka pynskhem biang ïa ki jingkular ban pynkupbor ia ki kynthei, ong u Lat

Ryngkat shi tyllup ka pyrthei ka jylla lyngba ka tnad Social Welfare hynne ka sngi 9 tarik Lber 2026, ka la rakhe burom ia ka sngi ki kynthei ka pyrthei International Women’s Day, kaba long ruh ka jingdap 11 snem ka skhim Beti Bachao Beti Padhao (BBBP) ha Lok Bhavan, Shillong.

Ia ka prokram la pynlong da ka State Sankalp Hub for Empowerment of Women ryngkat ka jingiatreilang bad ka tnad ka Koit ka Khiah, ka tnad Public Health Engineering bad ka Meghalaya State Rural Livelihood Society halor ka phang pdeng Ai ban Ioh (Give to Gain).

Ha kane ka jingïalang la ïadonlang u Nongaibuit ka tnad Social Welfare u bah Paul Lyngdoh, ka Santa Mary Shylla MLA, Chairperson ka Meghalaya Handloom and Handicraft development Corporation, ki heh ophisar, ki nongshah khot sngewbha bad kiwei.

U Lat ka jylla u C.H. Vijayashankar haba ai jingkren ula ong, ka jingpynkup bor ia ki kynthei bad ban pynthikna ia ka jingiaryngkat ka long kaba kongsan na bynta ban tei ia ka imlang sahlang kaba khlain bad kynthup ia baroh. Ula kdew kane ka prokram ka dei ruh ka jingrakhe ïa ka jingdap 11 snem jong ka jingthmu ka Beti Bachao Beti Padhao, kaba la sdang hapoh ka jingïalam jong u Myntri Rangbahduh ka ri u Narendra Modi, kaba thmu ban kyntiew ïa ka jingïada, ka jingnang jingstad bad ka bha ka miat jong ki khynnah kynthei.

U Lat ula ong ka jingïalang ka la ai lad ban bishar ïa ka jingkiew ba la ïoh haduh mynta bad ban pynskhem biang ïa ki jingkular na ka jingpynkup bor bad ka jingbha jingmiat ki kynthei. Haba ïa dei bad ki kyndon riti synshar ka ri, ula ban jur ka jingïaryngkat ka long katkum ka Article 15 ka Riti Synshar ka ri India, kaba khang pyrshah ïa ka jingïapher jaitbynriew, ka jingngeit ne ka kynthei bad shynrang.

Ula bynrap ka jingdon ki kynthei ha ka ïing dorbar thaw aiñ ka jylla ka dang duna bha, ha kaba tang lai ngut ki kynthei napdeng ki 60 ngut ki dkhot. U la pynpaw ka jingkyrmen ba ka jingthmu ban buh kyrpang 33 percent ia ki kynthei ha ki iing dorbar thawain kan pynkiew ia ka jingiashim bynta ha ki por ban wan.

U la pynpaw ia ka jingsngewkhia halor ka jingkha khun ki khynnah samla bad iathuh ka dei ka mat ba ktah jur ia ka koit ka khiah, ka jingnang jingstad bad ka lawei jong ki khynnah kynthei ha Meghalaya bad ha kylleng ka ri. Ula ban jur donkam ban pynsngewthuh ban pynbha ia ka lad ban ioh ia ka jingnang jingstad bad ka jingkyrshan ba khlain jong ki paidbah ban weng ia ka jingeh.

U Lat ula pule ruh ia ka khubor halor ka jingpyllait paidbah ia ka Jal Mahotsav.

Ka kong Santa Mary Shylla ha jingkren ka la ong, ki kynthei ha kane ka jylla ki nang ioh ia ka jingkyrshan ba kham bun ha ki bynta kum ka pule puthi, ka jingialehkai bad kiwei ki bynta. Ka la ai khublei ïa ka jingïalam u Myntri Rangbah ka Jylla Conrad Sangma na ka bynta ban pynkhlain ïa ka jingpynkupbor ïa ki kynthei, khamtam lyngba ki Self Help Group (SHG), kiba la thaw ïa ki lad ki lynti bad kyntiew ïa ka bynta ki kynthei ha ka imlang sahlang.

U nongaibuit ka tnad Social Welfare u Paul Lyngdoh ula ai khublei ïa ki kynthei bad pynpaw ïa ka rukom ai jaid ia khun ba kyrpang da kaba kdew ba ki jaitbynriew Khasi, Jaiñtia bad Garo ki ai ka jaka ba kongsan ïa ki kynthei ha ka imlang sahlang.

Ha kane ka prokram la sam ïa ki tiar sumar sha ki Urban ICDS Projects. La sam ruh ïa ki khusnam hapoh ka Swasth Nari, Sashakt Parivar Abhiyaan (SNSPA) da ka tnat ka Koit ka Khiah, na ka bynta ki jingnoh synñiang bad len lade ban pynkupbor ïa ki kynthei da ka Meghalaya State Rural Livelihood Society, bad na bynta ka jingtbit ha ka kam ban ïalam da ka imlang sahlang ka FTK-based water quality monitoring Jal Jeevan Mission.

La pynkut ia ka prokram da ka jingpynkup burom ia ki kynthei ba la jop kum ka jingialehkai, ka seng kam seng jam, ka rep ka riang bad ka jingshakri ia ka imlang sahlang kum ka jingithuh ia u synniang jong ki.