Kan poi ka por ngin ialeh thma na bynta ka um lada ngim iada ia ki tyllong um:DC

Ka Public Health Engineering (PHE) Department, West Khasi Hills District mynta ka sngi ka la rakhe ïa ka World Water Day ryngkat bad ka Jal Arpan Ceremony ha Trysem Hall, DC Office, Nongstoiñ.

La pynïaid ïa ka prokram da ka Miss Merciful Paliar (JJM), katba ïa ka jingkren pdiang sngewbha la ai da u Bah L.O. Dhar, Superintending Engineer, PHE Western Circle, Nongstoiñ katba u Teilang Kharrubon, Executive Engineer, PHE Nongstoiñ Division, u la batai halor ka phang “Water and Gender”.

Haba ai jingkren kum ka kongsan ka Deputy Commissioner, West Khasi Hills District ka Hema Nayak (IAS), ka la pynpaw ïa ka jingdonkam ban shim ïa ka jingkitkhlieh ha ka jingpynneh bad ïada ïa ki tyllong um. Ka la ban jur ruh ïa ka bynta ba kongsan jong ki Self Help Groups (SHGs), Village Employment Councils (VECs) bad ki paidbah nongshong shnong ban sumar ïa ki tyllong umbam umdih ha ki shnong jong ki.

Ka Deputy Commissioner ka la kdew ruh ba ka Nongstoiñ ka dei kawei na ki jaka sor kaba nangkiew stet bha, ha kaba ki jaka ki puta ki la nang duna. Ka la pynpaw ka jingsngewkhia ba kane ka jingkiew stet ka lam sha ka jingwan ban kurup jaka wat ha ki bynta jong ki tyllong um, kaba ktah jur ïa ki tyllong um ba ai ka mariang. Ka la ong ruh ba ym tang ha ki jaka sor, hynrei wat ha ki shnong nongkyndong ruh la sdang ban don ki jingeh namar ka jingtyrkhong jong ki tyllong um bad dei na kane ka daw ba ki mih ki jingujor halor kane ka skhim JJM hynrei ka daw tynrai ka dei namar ba ki tyllong um ki la tyrkhong noh.

Ka la ong ba bun sien ki briew ki sngewthuh ïa ka jingkordor jong ka um tang ynda ki la mad hi ïa ka jingkyrduh. Lada ym shim ïa ki sienjam kiba biang bad ha ka por ba dei, ka jingkyrduh um kan lah ban wanrah ïa ki jingkajia ba khraw ha ki por ban wan. Ka la maham ruh ba ka por kan sa wan ba yn sa ïaleh thma tang na ka bynta ka um lada ym shimkhia ban pynneh bad ïada ïa ka um. Kumta ka la kyntu ïa baroh ban shimkhia naduh mynta ban pynneh bad ai jingïada ïa ka um, khnang ba ki pateng ban wan kim dei ban mad jingeh.

U Bah Teilang Kharrubon, Executive Engineer, u la batai halor ka phang “Water and Gender”, bad u la ong ruh ba ka PHE Department ka dang pynpoi umbam umdih naduh tynrai sha ki longïing lyngba ka Jal Jeevan Mission (JJM). U la ong ba naduh mynta, ka tnat kan pynpoi um tang haduh ki tanky bad kan dei ka jingkitkhlieh jong ki shnong ban pynïaid ïa ka jingpynpoi um sha man la ki longïing. La kyntu ïa ki shnong ban thung briew ban peit bad pynïaid ïa ka um khnang ba kan ym don kano kano ka longïing kaba shah iehnoh.

Da kaba kdew ïa ka jingpyrkhat bakla kaba ju don, ula ong ba bun ki paidbah ki ñiew ïa ka skhim JJM ba ka dei ka skhim ka Sorkar bad ka jingkitkieh ruh kan dei jong ka Sorkar hynrei kane ka jingpyrkhat ka dei kaba bakla shibun eh. U la ong ba ka sorkar lyngba ka tnat PHE ka ialeh ban pynpoi ia ka um sha ki tanky bad pyntikna ba ka um kan poi beit ha kita ki jaka pynlang um, bad ki nongshong shnong ruh ki don ka hok ban ujor sha ki, lada ka um kam poi ha kita ki jaka pynlang um kum ki tanky ne ki top um bad ka dei ka kamram jong ka PHE ban leh ia kata, hynrei lada ki shnong kim shim ïa ka jingkitkhlieh ban sumar ïa ki pipe, ki stopcock, ki jingtei, bad kiwei kiwei kan wanrah jingeh ïa ki paidbah jong kata ka shnong.

Ha katei ka sngi la ioh ruh ban sam ïa ki certificate sha ki shnong kiba la lah ban pyntreikam pura ïa ka Jal Jeevan Mission, kaba pynthikna ïa ka jingïoh um bam umdih ha man la ki longïing.