Ka thong “Viksit Bharat” kan urlong lada ka umbam ka poi man ki longing: CR Patil

Ka Sorkar Meghalaya hynne ka sngi ka la iasoi ia ka Memorandum of Understanding (MoU) bad ka National Jal Jeevan Mission (NJJM), kaba hap hapoh ka Ministry of Jal Shakti ka Sorkar Pdeng ban pynsted ia ka jingpyntreikam ia ka Water Supply Scheme lyngba ka JJM ha kylleng ka Jylla.

Ka soskular ka iasoi ia ka MoU lyngba ka video conference ha ka jingiadon ryngkat u Myntri Rangbah ka Jylla Conrad K Sangma bad u Myntri ka Jal Shakti u CR Patil, khnang ban pynlah ia ka Sorkar Pdeng ban pyllait ia ka song pisa katkum ka jingtreikam hapoh ka skhim ka Jal Jeevan Mission.

Ka MoU ka la ban jur halor ka jingpynthikna ia ka jingtreikam ba neh jong ki Rural Water Supply System bad ka Sorkar Jylla ka dei ban shim jingkitkhlieh ban pyntreikam bad ban peit thuh ia ki jingneh ki jingshakri.U Secretary & Commissioner (PHE), Meghalaya, Pravin Bakshi, ryngkat ki Heh Ophisar ki la iadonlang ha kane ka jingialang.

Haba ai jingkren, u Conrad ula pdiang ia kane ka soskular bad ban jur ia ka jingkut jingmut ka Sorkar ban pynioh ia ka um bam umdih ba shngain bad bakhuid sha baroh ki longiing. Ula ban jur ia ka jingdonkam ban don ka water policy ba bniah bad ula kren ruh ia ki jingpyrshang ba dang iaid mynta ban pynim pat ia ki tyllong um ha kylleng ka jylla Meghalaya.

U Patil ula pynpaw ia ka jinglong kongsan ka jingshakri sha ki jaka ba jngai duh bad ula ong ka thong jong ka “Viksit Bharat” ka lah ban urlong tang lada ka umbam umdih kaba shngain ka poi sha man ki thliew iing. U la ban jur ba dei ban pyntreikam thikna ia ka Jal Jeevan Mission ha ryngkat ka plan ba bniah bad ba don jingmih.

U Myntri ka Sorkar Pdeng ula khot ruh ia ka jingklop lang ia kiwei ki prokram, kynthup ia ka G-Ram-G Programme ban pynmyntoi shuh shuh bad nang pynkhlain ia ka rukom pyntrei ia ki kam.