Ka khana ka Shnong Lawjynriew ka ïasoh lang ia ka jingroi ka sor Shillong: Conrad

U Myntri Rangbah ka jylla u Conrad K Sangma hynne ka sngi ula plie ia ka jingrakhe dap 150 snem ka Dorbar Shnong Lawjynriew ha madan phutbol Lawjynriew, Nongthymmai. Ha kane ka sngi la donlang u Myntri ka tnad pule puthi u Bah Lakhmen Rymbui, MLA ka Nongthymmai u Bah Charles Pyngrope bad u Chief Executive Member ka KHADC u bah Winston Tony Lyngdoh. Haba ai jingkren u Myntri Rangbah u Conrad K Sangma ula pynpaw ka jingkmen ban ïashim bynta ha ka jingrakhe ïa ka jingdap 150 snem ka Shnong Lawjynriew bad ula ai khublei ïa ki paidbah nongshong shnong ka Lawjynriew bad bynrap, “Ka long ka jingkmen ia ka jingpdiang burom da ka riam tynrai Khasi ban pyni ia ka kolshor la jong bad ngi la sakhi ïa ka pateng ba riewspah bad ka jingïatylli ka shnong. Kan long ka jingpynkynmaw bad sngew sarong ïa ngi kum ka jaitbynriew.”

Ula ong, ka Lawjynriew kam dei tang ka khana shaphang kawei ka shnong hynrei ka khana ka ïasoh lang bad ka jingroi ka nongbah Shillong bad ka histori ka jylla. “Naduh ki sngi banyngkong hapoh ka jingsynshar ka Hima Mylliem haduh ka jingpynrung kyrteng ha u snem 1876, kane ka shnong ka la ieng hapdeng ki jingtynjuh ka por,” ula ong bad ai khublei ïa ka shnong Lawjynriew kaba ieng ban pynneh ïa ka jinglong tynrai wat hapdeng bun ki jingkylla. “Na ka jaka sah kaba tynrai ha ka riti dustur kan nangroi sha ka shnong bad kiwei ki jaka na ka jingwan ki briew na ki bynta bapher bapher jong ka ri, khamtam ïa ki samla pule na kylleng ka thaiñ Shatei Lam Mihngi,” u la bynrap. U Myntri Rangbah ula ong, ka pateng jong kane ka jaka ka nang riewspah ha kaba ia dei bad ki jaka pule bad ka jingnoh synñiang sha ka pule puthi bad ka roi ka par ha ka imlang sahlang kaba ieng kum ka dak jong ka jingïatylli, ka jingïalong kawei bad ka jingkiew shaphrang.

Halor ki mat bad ki tnat treikam tynrai ha ka imlang sahlang ula ong, ba ka rukom treikam ki dorbar shnong ka dang iai bteng ia ka bynta ba kongsan. “Kine ki long ki mawjam ba skhem ha ka synshar tynrai ban pynthikna ia ka jingïashim bynta lang ki paidbah ban pynneh pynsah ïa ki riti dustur bad ïa ka jingïatylli,” ula ong bad ula ïaroh ïa u Rangbah Shnong bad ïa baroh ki dkhot ka Dorbar halor ka jingaiti jong ki ban trei kum ki nongïalam shnong.U Myntri Rangbah ula pan ka jingïatreilang ia ka shnong na bynta ki projek kam pynroi bapher hapoh ka shnong bad ula kular ban ai jingiarap T.30 lak na ka Chief Minister’s Special Development Fund na bynta ki kam pynroi ha shnong. Ha kane ka sngi u Myntri Rangbah ula plie ïa katto katne ki projek kam pynroi ka Shnong Lawjynriew kynthup ïa ki CCTV ha ki 8 tylli lad hapoh shnong bad la pyllait paidbah ruh ïa ka website bad ka Dashboard ka shnong. Ha ka jingialang la pynkup burom ruh ki nongïalam bad ki riew rangbah da u Myntri Rangbah bad la pynphuh pynphieng ia ka prokam da ki jingtem bad shad tynrai.