Palat T.4 klur ioh skhim 2 tylli ki DS jong ka thaiñ Laban

Ka Shillong South constituency hynne ka sngi ka la ioh 2 tylli ki skhim ba kot ym duna T.4.09 klur ba la pynioh da u Myntri Sorkar uba dei ruh u MLA jong ka thain u Bah Sanbor Shullai. Kine ki skhim ki dei ki Dorbar Hall cum Cultural Centre na ka bynta ka Dorbar Shnong Kynjat Football Lumparing bad ka Dorbar Shnong Madan Laban-Riat Laban. Iaka Dorbar Shnong cum Cultural Centre ha Kynjat Phutbol la mang ban tei ha ka jinglut kaba T.2.05 klur bad iaka Dorbar Shnong cum Cultural Centre ha Madan-Riat Laban la mang ban tei ha ka jinglut kaba T.2.03 lak.Kine ki Dorbar Shnong cum Cltural Centre kin don ki Ïing dorbar, ki Ophis jong ki Seng Samla, Seng Kynthei, ki ophis treikam jong ki shnong, ki sports club bad kiwei kiwei jaka ban pyndonkam daki riew paidbah jong ki shnong.

Ha kane ka sngi naka liang u MLA ka thain u Bah Sanbor Shullai haka jingdon lang ki nongialam shnong bad ki riew paidbah ula plie ia u Mawnongrim bad aiti iaki Work Order shaki Dorbar Shnong khnang ban sdang noh iaka jingpyntrei ia baroh 2 tylli ki project. Haba kren ha ka jingialang, u Bah Sanbor Shullai ula ong, “Nga sngewkmen ba nga la lah ban pynioh ia ka bhah tyngka ban shna ia kine ki artylli ki projek bad nga dei u briew uba trei bun da ka kam bad duna ha kaban kren, kumba long kiwei pat ki nongialam kiba heh tang ka tyngam bad ban pynbeij da ki jingkren”. Ula pynpaw ia ka jingkyrmen ba ynda la dep shna ia kine ki artylli ki projek kan long ka jingkyrkhu bad ka jingmyntoi ia baroh ki nongshong shnong khnang ba kin lah ban pyndonkam ha kiba bun ki liang bad ka Dorbar Shnong kan ioh ruh ban pyndonkam ha kaban pynlong ia ki prokram ki bapher bapher.

Ki nongialam shnong kila pynpaw ia ka jingsngewnguh ia u Bah Sanbor Shullai uba la pynurlong ia ka jingangnud jong ki paitbah khamtam ha kaban wanrah ia kine ki projek bad ban peit ia ka bha ka miat bad ban kyntiew ia ka roi ka par ha ka constituency baroh kawei.