Khynra ‘thei die met ki pulit, ïoh kem 16 ngut, kurup kali bad thuk thuk

Ki Pulit ka East Khasi Hills hynnin ka miet ki la khynra ha kylleng ka sor Shillong pyrshah ia kito kiba donkti ban leh ki kam awria bad ha kane ka jingkhynra ki la ioh kem ia 16 ngut ki kynthei ba kynnoh die met kynthup ia ki 4 ngut ki ‘Agents/Pimp’ kiba donkti ban pyniaid ia ki kam die met hajan ki jaka mane Blei bad khamtam halor ka jingroi ka jingpang HIV ha nongbah Shillong. U Superintendent of Police (SP) ka East Khasi Hills u Bah Vivek Syiem, ula pyntip ki pulit ki la pynlong ka jingkhynra hadien ba ki la ioh pdiang ia ki jingujor na ki nongshong shnong ba don ka jingpyniaid ia ki kam awria hajan ki jaka mane Blei bad khamtam bad na ka jingkiew ka jingpang HIV ha Shillong bad kumta ki pulit ki la pynlong ka jingkhynra ryngkat ka jingiatreilang ha kylleng ki jaka.

U la pynpaw ba ka jingkhynra la sdang na Khyndai Lad Pegasus Hotel-Presbyterian English Service Church, ka jaka kaba mar pyr-shah ia ka SBI Main Branch, ka jaka ba don mar pyrshah ia ka ophis treikam jong ka MBOSE ha Lachumiere, IGP Point. Ia kane ka kynhun pulit la ialam da u Additional SP u Bah Ivan Diengdoh bad la synranlang da ka Kong Joyti Wahlang ba long ka DYSP WCC, OC Sadar PS, OC ka Women PS, OC ka Laitumkrah PS bad kiwei ki ophisar pulit. U SP ula pynpaw ha kane ka jingkhynra ki ophisar bad ki pulit ki la kem 16 ngut ki kynthei na kylleng ki jaka katba ki dang donkti ha ki kam ba ia dei bad ka kam awria bad ka kam die met bad 4 ngut na kine ba shah kem ki dei ki ‘Agent/Pimp’ ne ba plie lad ne pynioh ia ki kynthei da kaid na ka bynta ban leh ia ki kam awria.

Ki pulit ki la ioh kurup ia kawei ka kali Swift Dzire bad 2 tylli ki thuk thuk ba la pyndonkam ban leh ia kitei ki kam be-aiñ, kumta ki pulit ki la rejistar Case hapoh ka Sadar PC kaba long ka Case No 119(03)2026 U/S 4/5/7/8 I.T.P.A  hapoh ka Section 110 jong ka Meghalaya Police Act pyrshah ia kitei ki briew ba shah kem.