Kylla ïingjah ka ophis DTO Nongpoh, khang bun ki dukan bym don nongleit nongwan

Ka ophis u District Transport Officer (DTO), Ri Bhoi District ka kylla kum ka iingjah ha kine ki sngi, namar kam shym la maramot ne pynbha la bun bun snem bad bun ki dukan ki khang, namar ki nongleit nongwan ruh kim ju rung shuh ha katei ka jaka wat la ka don ka phyllaw ba biang ban pynieng kali bad kiba rung ki dei tang kito kiba donkam eh. Kum ban pynpaw kane ka ophis ka don harud shurokbah National Highway Shillong-Guwahati bad ki briew man ka sngi, da ki hajar ki iaid lyngba kane ka surok bad haba ki iaid ki iohi ia ka jinglong jingman kane ka ophis bad ka long ka jinglehrain ia ki bor pyniaid District bad ia ka tnad Transport, balei kam lah ban siangrong ia ka phyllaw bad ai rong itynnad ia ka ophis bad ki sawdong sawkun kumba long ki ophis ha Shillong, wat ki kynroh ki phuh synstiew miet bad sngi. Katba ka ophis DTO Ri Bhoi ka kylla kum ka iingjah. Kane ka pynpaw ba ka sorkar ka leh bein ia ka Ri Bhoi District bad ki nongshong shnong jong ka.

Haba kren ba u Nongthoh Khubor u District Transport Officer, ka Ri Bhoi ula iathuh na ka liang ka ophis ki la phah jingthoh la slem sha ka sorkar na bynta ban siang rong ia ka phyllaw bad kumjuh ban pyntynand ia ka ophis bad kiwei ki jingdonkam na bynta ka jingkhuid ka ophis hynrei haduh mynta ka sorkar kam pat leh eiei. Ula bynrap na ka por sha ka por ula pynkynmaw hynrei ki bor ba halor kiba dei peit kim shym leh eiei haduh mynta. Kum ban pynpaw ka ophis Transport ha Ri Bhoi ka dei kawei na ki ophis ba ioh kamai bun na ki ophis DTO ha ka jylla, namar ka jingdon ki jaka thew “Weight Brigde” ia ki kali ba mih bad ba rung hapoh Meghalaya ha Umling bad kiwei jaka ban check ia ki kali.

Hynrei kaba lyngngoh ka sorkar ka leh klet ban pynbha ia kane ka ophis bad ia kane ym lah ban tip ioh ka don eiei sha lyndet bad ki bor pyniaid na jrong.Kum ban pynpaw ki nongmihkhmat MLA/MDC ka Ri Bhoi, ki dei ban shimkhia lang na bynta ka jingbit jingbiang ka ophis bad kumjuh ia ki paidbah ka Ri Bhoi District bad kane ka jingleh ka sorkar MDA ka paw bal eh shiliang ia ki kam pynroi.