Dang bishar u Lamphang ia ka rai phah sospon ka VPP ia u Bah Adelbert

U Lamphang ka Iingdorbar Thaw Ain Thomas A Sangma hynne ka sngi ula iathuh ba u dang bishar ia ka jingkyrpad u MLA ka Voice of the People Party (VPP) na North Shillong constituency u Bah Adelbert Nongrum uba la shah Sospon ha ka Party. Lah ban kdew ha ki bnai ba la dep, u Bah Adelbert Nongrum ula thoh sha u Lamphang ka Iingdorbar da ka jingkyntu ban ym pdiang ia ka hukum sospon da ka Voice of the People Party (VPP). Ka VPP ka la Sospon ia u Bah Adelbert Nongrum na ka bynta lai snem ha u bnai Lber 2025 halor ka jingkynnoh ba u leh ia ki kam ba long pyrshah ia ka party.U Bah Adelbert ula ban jur ba u dang dei u Nongmihkhmat ba la jied da ki paidbah katkum ka Riti Synshar. Haba kren sha ki lad pathai khubor u Lamphang ka Iingdorbar Thaw Ain ula iathuh ha ka shithi na u Bah Adelbert, u khlem la kyrpad kum u MLA.

“U Bah Adelbert ula ieng pyrshah ia kane ka hukum sospon na ka VPP, kaba la phah sha u kum u “Adelbert Nongrum, Jaiaw Shillong”, kam shym la kdew ia ka kyrdan MLA jong u “la ong u Lamphang.U Lamphang ula ong ba kane ka lah ban lam sha ka jingkulmar jingmut, namar ki lah ban don ruh kiwei ki briew kiba don ia kajuh ka kyrteng bad ba sah ha Jaiaw. Ula iathuh ba phah ia kane ka kam sha ka Tnat ain bad sha u Advocate General jong ka Jylla ba kin shong bishar.Watla u Thomas Sangma u kubur ba ki lah ban don ki briew ba mynjur ia ka jingpyni nia u Bah Adelbert, hynrei ula pynpaw pat ba kane ka hukum sospon hapoh ka Iingkashari ka lah ban shah buh jingkylli namar ka jingbym batai shai.

“Nga la phah sha ka tnad Ain bad ruh sha u Advocate General ka Jylla jong ngi ban bishar” la ong u Lamphang.Halor ka jingkylli u Lamphang ula ong, “Ngam tip hynrei ki don ki briew ba lah mynjur bad u Bah Adelbert Nongrum ruh namar ka hukum sospon ia u ka khlem pynpaw kum u MLA ka lah ban nym ieng satia hakhmat ka ain”. U Thomas ula ban jur ba ula ioh ia ka jingpyntip halor ka jingsospon bad um lah satia ban kynthoh ia ka rai jong ka seng sain pyrthei.