Kama dei ka rai shimet, dei ka jingkwah ki paidbah:Ronnie V Lyngdoh

Ha ka sien banyngkong hapoh ka Jylla Meghalaya ba ka Congress kam don nongthaw ain lane MLA hapoh ka Iingdorbar Thaw Ain ka Jylla, la ka dei ha ka Liangsynshar ne ha ka Liangpyrshah.Kane ka long hadien ba u MLA ba marwei ka Indian National Congress (INC) u Bah Ronnie V Lyngdoh hynne ka sngi ula leit ban pyniasoh ialade sha ka National People’s Party (NPP) kaba ialam ia ka Sorkar synroplang ka Meghalaya Democratic Alliance (MDA) kaba don mynta 33 ngut ki MLA. U Bah Ronnie uba dei u MLA ka Mylliem constituency ula aiti ia ka shithi ba la mih noh na ka Congress ha u Lamphang ka iingdorbar thawain ka Jylla u Thomas A Sangma.Haba kren sha ki lad pathai khubor u Bah Ronnie ula ong ba ka jingleit iasoh jong u sha ka NPP kadei kaba khlem da buh kano kano ka kyndon.

U Bah Ronnie ula pynpaw ba kum u dkhot ka NPP un iakren bad u Myntri Rangbah ka Jylla ban pynthikna ia ka jingskhem bad ka roi ka par na ka bynta ki paidbah ka thain Mylliem constituency bad ka Jylla baroh kawei.“Kam dei ka jingkwah jong nga shimet. Ki briew ki la kyrpad ia nga naduh u 2018. Nga la iai sah bad ka Congress naba nga la shah jied na ka ticket ka congress. Hynrei mynta ba la palat mar shiteng ka samoi ka la iaid, ki nongkyrshan jong nga ki ngeit ba la dei ka por ban buh ha khmat ia ka jingskhem bad ka roi ka par” la ong u Bah Ronnie.U Bah Ronnie ula batai ia ka jingthmu jong u ka dei ka jingkwah ki paidbah ba un leit iasoh noh sha ka seng sain pyrthei kaba synshar ia ka Jylla.

Halor ka jingkylli, u Bah Ronnie ula kdat sharud ia ki jingmutdur ba kan mih ka kynrum kynram hapdeng jong u bad u MLA barim bad nongialam ka NPP Bah Hamletson Dohling.“Nga la shah jied ha ki paidbah. U bah Hamlet u dei u MLA barim. Ngi baroh arngut ngi la kut jingmut ban iatreilang na ka bynta ka constituency” ula ong.Haba kylli ba mano ban long ki kyrtong ka NPP na Mylliem ha ka elekshon ban wan, u Bah Ronnie ula jubab da kaba ong “Ngin sa rai yn da la dei ka poi. Ynda ngi la jam ia kata ka jingkieng”.