U Symbud Myntri Rangbah ka Jylla u Bah Prestone Tynsong hynne ka sngi ula plie ka jaka buh jingduwai Thomas Jones I Prayer House jong ka Presbyterian Church of India (PCI) ha shnong Kutmadan Sohra. Ka plie ia kane ka ïing jingduwai ka dei shibynta ban rakhe ia ka lyngkhuh sngi ka jingwan iuhkjat u Thomas Jones ba 175 snem ha Ri Khasi. Ha ka jingialang la iadonlang u MLA ka Sohra u Bah Gavin Mylliemngap, ki dkhot ka PCI, ki nongsharai Balang bad kiwei kiwei.
U Bah Prestone Tynsong ula iaroh ia ka PCI ban shim ia kane ka sien jam ba bha tam, khamtam ban burom ia ka sngi ba u Thomas Jones ula wan iuh kjat sha ri Khasi ban wanrah ia ka thoh ka tar ban seng ia ka niam ha kane ka thaiñ. Ula ong kane ka jaka jingduwai kan long ka jingkyrkhu ia ki paidbah ba kwah ban buh jingduwai.
Halor ka jingkyrpad ka PCI ban tei ia ka Thomas Jones Complex, u Bah Prestone ula kular ban shimkhia bad ula pyntip ba ula iakynduh ia u Myntri Rangbah ka Jylla u Conrad Sangma ryngkat ki Pastor ban iarap mang pisa khnang ban pynurlong ka jingtei ia ka Thomas Jones Complex kum ka dak ban kynmaw burom ia u Thomas Jones u riewkhraw ka thoh ka tar ka jaidbynriew Khasi bad u nongseng ia ka Balang Presbyterian.