Dawa buh Infiltration Check Point ka HYC ha Langpih bad Shahlang

Ka Hynniewtrep Youths’ Council (HYC) West Khasi Hills District hapoh ka jingialam u Vice President, Samla Disterborlin Wanniang, ryngkat u President bad Secretary ka Nongtrai Circle u samla Blaster Sohmat bad Spailin Wanniang ha ryngkat ki nongialam ka Ri Muliang Circle mynta ka sngi, ki la leit jurip ïa ka Infiltration Check gate ha Athiabari namar ka jingsngewkhia ia ka jingioh rung tuh jong ki poiwir hapoh ka jylla.

Ha kane ka jingleit, ka kynhun ka la ai mynsiem ïa ki pulit kiba trei ha katei ka jaka ban ieng pyrshah ïa ka jingwan rung tuh jong ki mynder-Ri  bad ka la pynpaw ruh ïa ka jing sngewnguh halor ka jingtrei shitom jong ki ban peitngor ia kiba kum kine ki briew.  Haba kren ha ki lad pathai khubor, u Vice President ka District, Samla Disterborlin Wanniang u la ong ba ka jingwan jong ka seng ka long ban ai mynsiem ïa ki pulit ba kin nang trei borbah ban ym ailad ïa ka jingrung tuh jong ki poiwir khamtam na ka jylla Assam. U la ong ruh ba wat lada ka HYC ka la ia kynduh ïa u Deputy Commissioner bad u Superintendent of Police ka West Khasi Hills ban pynpaw ïa ka jingkhuslai halor kane ka bynta, hynrei ka seng ka dang iai dawa ba ki bor district kin nang iai long kiba husiar.

Ka HYC ka la kyrpad jur ïa ka Sorkar Jylla bad ka Tnat Pulit ban pynkhlain shuh shuh ia ka rukom talasi da kaba buh sa kiwei ki Infiltration Check Point ha Shahlang bad ha Langpih, namar katkum ka seng kine ki sienjam ki long kiba donkam ban tehlakam ïa ka jingwan rung tuh jong ki briew ba nabar hapoh ka District. Ka seng ka la pynpaw ruh ba kan dang iai buddien bad peit pyrman kham bniah ïa kane ka jingeh ha ki sngi ban wan khnang ban pynthikna ba kan ym don satia ka jingrung tuh ne rung be-aiñ jong ki mynder hapoh ka Brinu Hynniewtrep.