Dawa ka NESO ia ka sorkar ban tehlakam ia ki mynder

Ka North East Students Organisation (NESO) hynne ka Lah sngi u Blei, ka la pynlong ia ka jingshong kyllain morngor ha kylleng ki jaka jong ka thain Shatei Lammihngi ban dawa na ka sorkar India bad sorkar jylla ban thaw noh ia ki ain ban iada na ka jingwan rung kyrtlep ki bar jylla ha kane ka ri. Ha kane ka jylla, ka NESO ryngkat ka KSU ka la pyllong ia ka jingshong kyllain morngor ha Khyndailad, Shillong ha kaba la wan synranlang da ki nongialam na ka seng HNYF, HITO nalor kiwei de. Haba kren sha ki lad pathai khubor, u Chairman ka NESO u bah Samuel Jyrwa ula ong ba kane ka jingshong kyllain morngor ka long ban pynbor ia ka sorkar India bad sorkar jylla ban shimkhia ban khanglad ia ka jingrung kyrtlep ki briew nabar ha kane ka ri, kaba lah ban buh jingma ia ki trai ri trai muluk.

U bah Samuel, ula ong ba ka sorkar pdeng da ki phew snem ka la shu shong kli kti halor kane ka jingrung kyrtlep ki bar jylla. “Ngi kwah ba ka sorkar India kan pyni da ki kam ha madan kumno ba kan iada ia ki trai ri trai muluk jong ka thain shatei lammihngi baroh kawei,” ula bynrap.U Chairman ka NESO ula ong ba ka sorkar jylla Meghalaya haduh mynta kam pat don ia ki ain kaban long shisha ka stieh kaban iada ia ki rit paid ha kane ka jylla. Halor ka jingbym pat lah ban pyntreikam ia ka Inner Line Permit (ILP) ha ka jylla Meghalaya, u Bah Samuel Jyrwa ula ong ba kane kadei ka mat kaba la ri ha kaba ka KSU kala dawa naduh u snem 1983 hynrei kaba sngewsih ka long ba ka sorkar India bad ka sorkar pdeng kaba mynta kim pat mynjur satia ban pyntreikam ia ka ILP ha kylleng ki jylla jong ka thain Shatei Lam Mihngi bad kumjuh ruh hapoh ka jylla Meghalaya.

Ula ong ba katba ym pat ioh ia ka ILP, lada ka sorkar ka pyntreikam ia ka MRSSA, 2016 kan long ka jingiada ia ka jylla namar ba kane ka ain ka don ia ki khyrdop kaban peit ia ka rung ka mih jong ki bar jylla. Ula bah Samuel, ula ong ba lada ka sorkar ka don shisha ka jingkitkhlieh na bynta ban iada ia ki rit paid, kadei ban shim ia ki sienjam ba tyngeh ban tehlakam ia ka jingrung kyrtlep ki briew ba nabar. Ha kajuh ka por u bah Samuel ula maham ia ki para khasi kiba pynrung beain ia ki bar jylla na Bangladesh sha kane ri namar kane kan long kumba pynrung ia u bsein hapoh ka iing lajong bad un sa puh kylla ynda u la syaid.