Dawa ka MPCC ban kyntiew kyrdan ïa ka surok DSSH sha ka National Highway

U President ka Meghalaya Pradesh Congress Committee (MPCC) uba dei ruh u MP Lok Sabha barim u Bah Vincent H Pala hynne ka sngi ula dawa naka Sorkar Jylla ban kyntiew kyrdan noh ïa ka surok DSSH sha ka kyrdan surok bah lane National Highway. Haka shithi bala aiti sha Myntri Rangbah ka Jylla u Conrad K Sangma, u Bah Pala ula ong ba ka surok DSSH ka shakri kum ka lynti kamai kaba kongsan, kaba kit haduh 80% u dewïong na ri lum Jaiñtia bad kaba pynïasoh ïa ki jaka kiba riewspah ha ki marpoh khyndew kum ka Sutnga, Sumer, Saipung, bad Nongkhlieh. “Wat la ka don ka bynta kaba kongsan ban pynsuk ia ka khaii pateng bad ban pynmih khajna kaba heh na ka bynta ka JHADC bad ka Jylla, hynrei kane ka surok ka la shah iehnoh bein slem bad ka dang sah ha ka jinglong kaba la jot rathai bha” la ong u Bah Pala.

U Bah Pala u la pynkynmaw ba katba ka Tnat Road Transport and Highways (MoRTH) kham mynshwa ka la mynjur ïa kane ka jingthmu ban kyntiew kyrdan, hynrei ka jingpyntreikam ia kane ka surok haduh mynta kam pat sdang. U la kdew shuh shuh ïa ka jingthmu jong ka Sorkar Jylla ban pynrung ïa ka surok hapoh ka skhim jong ka World Bank hynrei u la ban jur ïa ka jingdonkam ban leh kyrkieh namar ka jingsniew jong ka surok bad ki jingeh ba ki nongshong shnong ki ïakynduh man la ka sngi. U President ka MPCC ula ong ba naka liang u Myntri Rangbah u la pynthikna ba ka Sorkar Jylla kan shim ïa ki sienjam ba donkam ban leh eiei noh halor kane ka surok.

“Kane ka surok kam dei tang shaphang ka jingpyniasoh, ka dei shaphang ka jingim, ka khaii pateng, bad ka jingbha jingmiat jong ki hajar ngut ki briew. Ka jingpynslem ban pynbha ia ka surok ka la wanrah ia ka jingjynjar kaba khraw. Nga pdiang sngewbha ia ka jingpynthikna jong u Myntri Rangbah ka Jylla bad ngan iai bteng ban bud ia kane ka kam haduh ba ki paidbah kin ioh ia ki jingtei kiba ki dei hok ban pynduh” ula ong.