Ki nongdie jingdie madan kiba ju shong ha Jail Road kiba don hapoh ka shatri Hynñiewtrep Jail Road Street Vendors Association (HJRSVA) hynne ka sngi ki la dawa na ka Sorkar Jylla ban shah die jingdie naduh ka por 5 baje janmiet.
Ia kane ki nongdie jingdie madan na Jail Road ki la pynsngew hadien ka jingiakynduh ia u Symbud Myntri Rangbah ka Jylla uba khmih ia ka tnat Urban Affairs u Bah Sniawbhalang Dhar.
Haba kren sha ki lad pathai khubor ka President jong ka HJRSVA ka samla Clarissa Sohtun ka la ong ba ka jingwan kynduh ia u Symbud Myntri Rangbah ka dei ban kyrpad ban shah ia ki ban shong die jingdie ha Jail Road naduh 5 baje janmiet.
Ka samla Clarissa ka la iathuh ba naduh ki sngi nyngkong ba wan pyntip ka Shillong Municipal Board (SMB) ba hap mih na Jail Road, ki la dep ban pynshai ba jaka ba ki shong mynta ka dei tang ka lynti iaid kjat namar kata dei ban shah iaki ban die jingdie hadien 5 baje janmiet namar ka la dei ka por ba wai trei, wai skul namar ki paidbah ba iaid ruh kim shah pynwit shuh.
“Para ma ngi ruh ngi la ia mynjur ba ngin shong tang janmiet kata naduh 5 baje janmiet namar ka Iew jong ngi kadei tang naduh janmiet hadien ba wai trei, wai office namar ngim kwah pyndik iaki ba iaid khamtam iaki khynnah skul, lada ki shah tang naduh 5 baje janmiet ruh ngi hun bha” la ong ka samla Clarissa.
Ka samla Clarissa kala iathuh baka Sorkar kala dep ban pynkynriah iaki na Jail Road naduh 26 tarik Naitung hynrei haduh mynta kim pat ioh Notice naka SMA namar ki nongtrei ka SMB ki shu wan pynbna daki tynghung.
“Ngi la pan naka SMB daka jingthoh hynrei ki ong beit ba la wan pynbna katto, lah biang.
Ka Sorkar ka ai jaka thymmai ha Polo (Majestic) hynrei kala jngai palat ia ngi ban leit die jingdie shato” kala ong.
Ka nongialam jong ka HJRSVA kala iathuh ba ki 45 ngut ki nongdie jingdie madan ha Jail Road hynrei kiba la ioh COV kidei tang 24 ngut.
Haba kylli halor ka jingiakynduh bad u Symbud Myntri Rangbah ka samla Clarissa kala ong “Ula ong ba un shong jingialang shwa bad ki Ophisar”.
You may also like
-
Mad jingeh kiba leit shah sumar ha CHC Umsning ba duna Doctor
-
Lah ban ktah ka jingdon um bad ka rep ba duna ka jinghap slap ha Meghalaya
-
Pynlong ka Synjuk ki Rangbah Kur ka Bri u Hynniewtrep da ka Movement ban khanglad tuh jait ki bar jylla bad ai jaid kpa
-
Ka jingkynnoh ia ka Meghalaya ka daw ka jingshlei um ha Assam kam don nongrim: Prestone
-
Iaid beit ka ‘Public Hearing’ ka Shree Cement, siat ‘Tear Gas’ ki pulit ia ki paidbah, julor ki kali kynthup ka Ambulance ba shah kawang maw