Bthah u Dy CM ia ki tnad ban ai kaiphoid ia kiba sah ha Them Iew Mawlong

U Symbud Myntri Rangbah ka Jylla ba peit ia ka tnad pynroi sor u Bah Sniawbhalang Dhar hynne ka sngi ula ong, ha ka taiew ba khatduh mynta u bnai yn lum jingialang bad kiwei ki tnad sorkar ban iatai sani halor ka jingthmu pynkynriah ia kiba sah ha Them Iew Mawlong sha kawei ka jaka.U Bah Sniawbhalang haba iakren bad ki nongthoh khubor, ula iathuh ba ula bthah ia ki ophisar ba kin ai kaiphod na baroh ki tnad ba dei khmih shwa ban pynlong jingialang ban ioh bishar bniah.

“Nga la bthah ia ki ophisar ka tnad ban ai jingtip ba bniah bad ki kaiphod ba dang shen na ki tnad sorkar ki bapher bapher ban ioh iatai sani halor katei ka mat ha ka jingialang” ula ong.Halor ka jingkylli la ka Harijan Panchayat Committee (HPC) kan iashim bynta ha ka jingialang u Bah Sniawbhalang ula ong, katei ka jingialang kan dei tang ki tnad sorkar jylla.Ula bynrap ka jingialang kan long shwa ia ki tnad sorkar ba don bynta ban ioh ia ka kaiphod ba pura ha baroh ki liang.

“Hadien ngin lum baroh ki kaiphod na ki tnad sorkar kynthup ka kaiphod hapdeng ki Sorkar bad ka Harijan Colony, ka Sorkar bad ka Tnad Defence” ong u Bah Sniawbhalang bad bynrap b aula bthah ban pynkhreh ki jingdonkam ha ka taiew ba khatduh u Nailar” ula ong. U Symbud Myntri Rangbah ula kubur ba ka la slem ban pynbeit ia kane ka mat bad ba ka sorkar ka la shimkhia ban wad ki lad ki lynti ban pynbeit ia katei ka mat ba la sahteng la slem bah.