Pynjlan ka sorkar 3 snem ia ka EVP ban ai jingiarap thied kali ilektrik

U Symbud Myntri Rangbah ka Jylla u Bah Sniawbhalang Dhar, ula pyntip ka Sorkar Jylla ka la pynjlan lai snem ia ka Electric Vehicles Policy ban ai jingiarap (Incentives) ia ki nongthied kali ilektrik ha jylla.Haba iakren bad ki nongthoh khubor, u Bah Sniawbhalang ula ong ba ka kynhun myntri kala shim ia ka rai ban pynjlan sa 3 snem ia ka Electric Vehicles Policy ban ai jingiarap ia ki nongthied ia ki kali elektrik. Hynrei kin dang khein ia ka bynta ban ai jingiarap namar ba ki dang khmih bniah ha kaba iadei bad ka jingktah ia ka pisa ka tyngka bad kumta kin hap ban ap ia ka Tnad Pla Tyngka ka Jylla.

Ula ong, kane ka jingpynjlan kadei kaba la pynbna namar ba ka polisi kaba kham hashwa kala kut noh bad ka sorkar ka dang pynkhreh ia ki lad ai jingiarap na ka bynta kito kiba kynriah noh sha ki kali elektrik.”Ngi hap ban peit ha baroh ki liang. Lada ngi ai katne ki jingai jingmyntoi ia katne tylli ki jingdon jong ki kali, katno ngin shah ktah?. Ngin sa shim ia ka rai kaba khatduh” la ong u Symbud Myntri Rangbah.Ula ong, kaba nyngkong kadei halor ka jingai jingiarap khnang ban pynshlur ia ki paitbah bad kaba ar kadei halor ki jaka ban ‘Charge’ ia ki kali elektrik. Namar lada ka sorkar ka ai jingiarap hynrei kim don pat ki jaka ban ‘Charge’, te kaei kan long pat kumno, kumta kam long ban shu ia rai kyrkieh.

“Ngi hap ban rai ia kiei ki jait kali kiban ioh ia ki jingiarap, la kan dei ha ka liang jong ka jingrejistar ne ka jingthied ia ki kali kiba thymmai. Kane kadei ka bynta kaba ngi hap ban shim ia ka rai” la ong u Symbud Myntri Rangbah.