Hadien 20 snem, kiew palat 9 lak ngut ki nongthep vote ha Jylla

U Chief Electoral Officer (CEO) u Dr BDR Tiwari hynne ka sngi ula pyntip ba ka jingdon ki nongthep vote ha Meghalaya ka la kiew da palat 9 lak ngut ha ki 20 snem ba la dep.Haba kren sha ki lad pathai khubor u Dr Tiwari ula pynpaw ia kane hadien ka jingbishar bniah bad ia nujor ia ka thup kyrteng ki nongthep vote jong u snem 2025 bad iaka Intensive Revision kaba la dep pynlong ha u snem 2005.  Ia ka thup kyrteng nongthep vote kaba kham mynshwa la pynmih ha ka 15 tarik Iaiong 2005. “Ka jingdon jong ki nongthep Vote haduh u bnai Risaw 2025 ka long 2306,384 ngut haba ia nujor bad 13,35,816 ngut ha u snem 2005 kaba pyni ia ka jingkiew kaba khraw da 9 lak” la ong u Dr Tiwari. Ia kane u CEO ula pyntip hadien ka jingialang halor ka jingpynkhreh ia ka Special Intensive Revision (SIR) ha kaba ka Election Commission of India (ECI) ka dang iaid sha khmat ban pynbna pyntreikam ia ka SIR ha baroh kawei ka ri. U Tiwari ula ong ba ka jingdon ki nongthep Vote haduh u bnai Risaw 2025 ka long shynrang 11,37,316 ngut, kynthei ki long 11,69,062 ngut katba ha u snem 2005, ki shynrang ki don 6,64,306 ngut bad kynthei ki long 6,71,510.

Ha Meghalaya ki 6 ngut ki Third Gender ha u 2025 katba ha u snem 2005 ym shym la don satia. U CEO ula ong ba iaki nongthep Vote la bishar katkum saw tylli kynthup bala ithuh daka SIR. U iathuh ba ki don haduh 4 jait ki nongthep vote bala buh kat kum ka SIR. Kine ki kynthup ia ka thup A-ki nongthep vote kiba ki kyrteng la register ha u snem 2005 kin hap ban upload/aiti ia ki kopi jong ka thup nongthep vote u snem 2005 lem bad ki form pynrung kyrteng, ka thup B-ki nongthep vote kiba ki kyrteng ym shym la lap ha ka thup 2005 bad kiba la khia ha India hashuwa ka 1 tarik Naitung 1987, kin hap upload/aiti ia ki kot ki sla ba batai shaphang jong ki lem bad ka form thep kyrteng, thup C-ki nongthep vote kiba kha hapdeng ka 1 tarik Naitung 1987 bad 2 tarik Nohprah 2004 kiba ki kmie ki kpa kim shym la pynrung kyrteng ha ka thup nongthep vote u snem 2005 kin hap ban upload/aiti ia artylli ki kot-kikot ki sla ba batai shaphang jong ki bad ki kot ki sla la ka dei jong ka Kmie ne u Kpa bad ka thup D-ki nongthep vite kiba la kha hadien ka 2 tarik Nohprah 2004 kiba ki Kmie ki Kpa kim pat pynrung kyrteng ha ka thup nongthep vote u snem 2005, kin hap ban aiti/upload ia lai tylli ki kot ba donkam-ki kot ki sla ba batai shaphang jong ki, ki kot ki la jong ka Kmie bad jong u Kpa.

U Dr Tiwari u la pyntip ruh ba ka ECI ka la pynbna ba yn pdiang ïa ki Aadhaar Card kum ki kot ki sla kiba biang na ka bynta ban pynrung kyrteng ïa ki nongthep vote, nalor ki 11 tylli ki kot ki sla kiba la don lypa.Kane ka rai ka wan hadien ka jingbthah jong ka Supreme Court ban kynthup ïa ka kot Aadhaar kum ka jingpynshisha ïa ka jinglong trai ri.“Ïa ka Aadhaar card yn kheiñ kum ka kot kaba 12 na ka bynta ka jingpynrung kyrteng nongthep vote” u la bynrap.U CEO u la pyntip ba baroh ki jaka thep vote kiba ki nongthep vote ki don palat ia ka 1200 ngut ha kawei ka jaka thep vote la bthah ban pynbeit ryntih khnang ban pynsuk ia ka rukom thep vote bad ha ka Jylla, ki don 27 tylli kum kine ki jaka thep vote. “Nalor ki 27 tylli ki jaka thep vote, 49 tylli ki jaka thep vote thymmai ruh ki dei kiba la mynjur da ka ECI kum ki katto katne ki PS ha kaba ki nongjied ki la jan poi sha ka 1200 ngut, ki katto katne ki bynta namar ka jinglong lum bad ka jinglong ka jaka, ka jingjngai kaba lah ban niah kali bad kiwei kiwei ki jingsuk na ka bynta ki nongthep vote,” u la ong haba bynrap ba 12 tylli ki PS kidei kiba la pynïasoh lang sha ka general PS.