Hadien shisnem, ioh kem ki pulit ia ki koidi ba lait phet na Assam

Ki bor pulit ka Ri Bhoi District, ki la ioh kem biang ia arngut ki koidi ba la lait phet na kti ki pulit ha u snem 2024 na ka jaka sumar ha ka Civil Hospital Nongpoh. Kine ki arngut ki koidi kiba la ioh kem biang ki kynthup ia u Sunil Das 29 snem na shnong Goalpara Assam bad u Papu Chettri na ka shnong Mawsyntai, Ri Bhoi District. Katkum ka kyrwoh na u Superintendent of Police ka Ri Bhoi District u VS Rathore, la pyntip, ba ki pulit ha ka jingiatreilang bad ki pulit ka North Garo Hills District, ki la ioh ban kem biang ia ki ar ngut ki koidi ba lait phet na Nongpoh Civil Hospital ha ka 15 tarik Naiwieng, 2024.

La iathuh u Sunil Das u koidi ba la lait phet la ioh kem biang ia u ha ka 29 tarik Jymmang 2025, katba ia u Pappu Das la ioh kem biang mynta ka 3 tarik Jylliew 2025. Kine ki koidi ki dei ba la ioh phet ha kajuh ka tarik bad ki la rieh tngen ha Goalpara District jong ka jylla Assam da kaba pyndonkam kot ki sla thok ban pynithuh ialade. Ki pulit ki la iathuh ia u Sunil Das la kem bad rai pynrem katkum ka mukotduma jong ka Nongpoh PS Case No. 48(03)2022 u/s 224 IPC  bad u la pyndep ia ka jingpynsajia ha ka 22 tarik Iaiong 2023, hynrei la kem bad rai pynrem biang ia u katkum ka mukotduma jong ka Nongpoh Women PS Case No. 07(12)2018 u/s 5(l)(m)(n)/6 of POCSO Act bad la rai pynrem ia u ban pynsajia ia u da ka jingset jail baroh shi jingim bad u don hapoh ka Judicial Custody ha ka por ba u phet tuh.

Katba uwei pat u koidi ba la lait phet la ioh kem biang u Pappu Chettri ba ju sien kyrteng kum u Robert Chettri (32) u la shah kem halor ka jingkynnoh donkti katkum ka mukotduma ka Nongpoh Women PS Case No. 59(10)2019 u/s 341/363/376(2)(I) IPC. La iathuh kine ki koidi ki la phet ha kajuh ka sngi ha ka 15 tarik u Naiwieng 2024 bad ki la rieh tngen ha Goalpara district, Assam.