Ioh jingithuh ka Babadam PHC na ka NQAS ba biang rukom sumar ia ki paidbah

Ka Babadam Primary Health Centre (PHC) ha West Garo Hills ka la ïoh jingithuh na ka National Quality Assurance Standards (NQAS) jong ka tnad Ministry of Health and Family Welfare Sorkar India halor ka rukom ai jingsumar bad jingshakri ia ki paidbah. La pynwandur da ka National Health Systems Resource Centre (NHSRC) hapoh ka Quality Council of India (QCI), ka NQAS ka khmih bniah ïa ki jaka sumar paidbah kiba don ha kylleng ka ri da kaba peit ia ki bynta kiba kongsan kum ka jingsumar ïa ki nongpang, ka jingtehlakam ia ka jingpang, ka jingkhuid jingsuba, bad ha kaba iadei bad ka jingai jingshakri. Ka Babadam PHC mynta kadei ka Primary Health Centre kaba nyngkong eh hapoh ka rilum Garo ban ioh ia kane ka syrnod jingithuh.

Halor kane ka jingjop ka, Sr. Riya, Health Programme Manager ka Babadam PHC, kala ong, “Kane ka jingioh jingithuh kadei ka jingkyrkhu U Blei ia ka jingtrei shitom bad ka jingaiti lut jong ka kynhun baroh kawei. Ngi la ïatreilang ban thaw ïa ka jaka sumar kaba khuid, kaba ïadei bad ki nongpang bad kaba don ia ka sawdong sawkun kaba biang. Ka jingioh pdiang ïa ka jingithuh na ka NQAS kala pynshlur ïa ngi ban bteng ban kyntiew ïa ka kyrdan jong ka jingai jingsumar kaba man la ka sngi ia ka imlang sahlang” Ka Babadam PHC ka dei kawei na ki 122 tylli ki jaka sumar kaba la shah jied katkum ka Internal Performance Agreement (IPA) model, kaba dei ka sienjam hapoh jongka Meghalaya Health Systems Strengthening Project (MHSSP) bad kaba la bei tyngka da ka World Bank. Ka IPA ka dei ka rukom bhah pisa kaba la pynwandur ban pynkhlain ia ki jaka sumar da kaba pyniasoh ia ka jingtreikam bad ka jingbei pisa.

Kane ka jingjop jong ka Babadam PHC ka pyni ïa ki jingpynkhreh kaba da ki bnai, ka jingpynkhlain ïa ka rukom treikam bad ka jingpyrshang ban pynbha ïa ka jaka sumar da ka kynhun jong kane ka jaka sumar ryngkat ka jingioh ia ka jingkyrshan na ka Joint Directorate Quality Committee (JDQC), ka ophis jongka District Medical and Health Officer (DM&HO), WGH, ka MHSSP bad ka National Health Mission (NHM). Kane ka jingjop ka pynshisha ruh ia ka jingaiti met bad mynsiem ki nongtrei ha ka koit ka khiah ban ai jingsumar ia ki nongpang ha ki jaka kiba don ha kyndong bad ki bym ioh bha ia ki lad jingshakri.