Nalor ka kam kit coke, dawa ka MCT&DA ban kit Cement bad Clinker Jowai, Naitung

Ka seng ki nongñiah trok bad trai trok ka Jylla hapoh ka lama jong ka Meghalaya Comercial Truck and Driver Association, Jaiñtia Unit ha ka 26 tarik mynta u bnai ki la lum jingialang ha Samanlang hall ha Lumbihsyntu Mihmyntdu hadien ba na ka liang u DC ka East Jaiñtia Hills District ula kular ban pynbeit ia ka jingeh jong ki halor ka kam kit coke ba kynthup naduh ka dor ka mur kumjuh ruh ka jingioh trip.Ha kane ka jingialang la wan donlang ki nongñiah trok bad trai trok napoh Rilum Khasi lem bad u President ka Meghalaya Comercial Truck and Driver Association Central Body u bah Mosklandar Marngar.

Haba kren sha ki lad pathai khubor hadien ba la kut jingialang u Advicer Meghalaya Comercial Truck and Driver Association Jaiñtia Unit u Ardonki Talang u iathuh ba ka rai ba ki la shim mynta ka long ba kin phah ia ki kot kali sha ka kynhun ba la bthah da u DC khang ban ioh bynta kit coke hapoh Rilum Jaiñtia.Na ka liang u Chem Kyndait Chief Advicer Meghalaya Comercial Truck and Driver Association pat u iathuh ba ki la dep phah jingthoh ruh sha ki company cement ba kin ia pyrkhat lang ruh na ka bynta ka kit ka bah halor u cement bad clinker kumjuh, namar ba bun ki trai trok bad nongñiah trok ki la shah ktah bha naduh ba khang ia u dewiong ha ka Jylla.

Halor kane ka shithi ba ia dei na ka bynta ka kit ka bah halor u cement bad clinker, ki iathuh ba ki la ioh jubab pynban na u Thomas Nongtdu uba la jubab ba ym lah ban ai trip ia ki ha ki company cement।Kumta halor kane ruh ki la shim rai ban thoh biang ka shithi bad ban leit ai sha u DC kumjuh shaki company cement bad lada kin pdiang ia kane ka jingdawa kim banse ban pynlong jingiakhih.