Ïoh kyrdan Doctorate u Long Sing Bey na GIUB, USA

Ka Eastern Ri Bhoi Tourism and Environment Development ne ERTED hapoh ka jingialam u bah Alos Nongpoh hynne ka sngi ka la pynkup burom ia u Dr. Long Sing Bey uba la ioh ia ka kyrdan Doctorate na ka skulbah Global International University of Boston, USA kaba don ka tnad ha Delhi bad Goa. U Dr. Long ula wan shim ia kane ka kyrdan doctorate na Goa ha ka 24 tarik Naiwieng,2024. U Dr. Long Sing u dei u nonghikai skul uba la iohpdiang ruh ia ka khusnam na district bad state Education award, ka Indian Icon Educational Award bad kumjuh ka International educational award halor ka jingaiti jongu ban kyntiew ia ka pule puthi ha ka jylla.

Kum u nonghikai  uba don ia ka jinganngnud ban kyntiew ia ka pule puthi, u Dr Long ula seng ruh ia bun tylli ki skul ha ka thain Bhoi. Ki katto katne ki skul kiba ula seng ki long. ka Jingiaseng Kynthei ha Sohliya, Umpohwin UP school, UP school Sohliya, Khliehumstem UP and SEC school, Umta sec school, Nongpoh, Christian sec school, Hospiti, Nongpoh, Pongker LP school, thain Jirang, Umlaper English school, Lowai English school, Laru English School,  Umjakat English school bad Umsarang English school bad ka Modern Higher Secondary School, Bhoirymbong kaba u long Principal mynta.

Haba kren ha kane ka jingpynkup burom kaba la long ha Khapmara, Bhoirymbong mynta ka sngi, u Dr. Long ula pynpaw ba u don ka jingangnud ban kyntiew ia ka imlang sahlang khamtam ha ka pule puthi. “Naduh ba nga dang samla nga ju don ka jingangnud ban trei ia ka imlang sahlang bad ban kyntiew ia ka pule puthi ha ka thain bad khamtam ha ka thain Khappud ka jylla Assam,” la ong u Dr Long Sing.