Iohkem ka HYC ia u nong Bangladesh ba pynrung briew beain sha India

Hynne ka step ki dkhot jong ka HYC Jatap bad Shella Area Unit kila ioh bat ia uwei u nong Bagladesh uba la wan rung be-ain shapoh ka ri India lyngba ka thain khappud kaba don ha Shella. Ki dkhot ka HYC haba kila ioh jingtip ba kala don ka jingwan rungtuh jong ki nong Bangladesh kumta kila leit mardor sha katei ka jaka bad ki lah ioh ban bat ia uwei u nong Bangladesh lyngba ka jingiarap ki nongshong shnong bad katkum ka jingiathuh une u briew uba kila ioh bat ula iathuh ba kiwei pat kiba wan ryngkat ki lah lait phet noh na katei ka jaka hynrei katto katne pat ki lah leit rung biang shapoh u pud ka Bangladesh bad katto katne ki lah rung shapoh ri India. U Bah Pyndap Shongwan u President ka HYC-Jatap Unit ula pyntip, haba ka seng kala kylli bniah na une u briew uba lah ioh ban bat, ula pynpaw ba udei napoh Bangladesh bad ha kane ka sngi ula rung sha ri India ban iarap ia ki briew ba kin ioh rungtuh shapoh India bad ruh ban leh ki kam khaii tuh ia ki tiar ki tar ha ryngkat ki arngut ki nong India kiba shong basah ha ka Shnong Kalibari kiba kyrteng u Bono Biswas bad u Subash Baidya.

U la iathuh ba lyngba ka jingiarap jong kitei ki 2 ngut ula ioh 1000 tyngka na uwei u ne ka briew kaba ki pynrung tuh shapoh ri India, katba ia ka jingsiew sha kitei ki Arngut na India une u briew ula ong ba ym don jingtip eiei, hynrei ka kamram ka jongu ka long ban pyllait ne ialam lynti ia ki briew na ka jingker kiba don ha khappud bad hadien kata ki sa wan shim kitei ki Arngut pat ban ialam pat sha Shillong bad kiwei kiwei ki jaka. U President ka HYC-Jatap Unit, ula iathuh ba katkum ka jingphla jong une u nong Bangladesh ula ong ba kane ka jing pynrung ia ki briew na Bangladesh sha India lynga ka khappud ha ka thain Shella kala iaid mynta shibnai tam bad man ka miet kumba 10 ngut eiei ki nong Bangladesh ki rungtuh shapoh ri India kaba kynthup ruh ia ki kynthei bad tang ma u ruh u lah pynrung kumba 50 haduh 60 ngut eiei ha kine ki  khyndiat sngi kiba lah dep. Ka HYC kala leit ban aiti ia une u briew sha ki pulit ka Shella Police Station bad dawa ba dei ban shimkhia ban pynlong ka jingtohkit kaba thikna halor ki jingphla jong u bad ban kem ia ki ‘Dalal’ na India kiba ula jer kyrteng.

Ka Seng ka kyntu ruh ia ki bor pulit bad ki shipai BSF ba kin shimkhia bha ia kane ka kam khnang ban lap ia baroh kiba donkti ha kane ka kam khaii briew lyngba ka khappud bad kumjuh ruh ban lap bad kem ia baroh ki briew kiba lah wan rung tuh shapoh India katkum ka jingpynpaw jong une u nong Bangladesh. Ki Nongialam ka HYC kila pyntip sha u SP ka East Khasi Hills bad SDPO ka Sohra Sub-Division bad sha ki heh ka BSF Meghalaya Frontier na ka bynta ban shimkhia ia kane ka kam bad ka seng kan iai peit pyrman ia kine kiei kiei nangne.