Jam ka Jingshai Barit LP skul ia u mawmer ba 25 snem ka jingshakri

Ka Jingshai Barit SSA LP School Pyrnai hynne ka sngi ka la rakhe ia ka jingdap 25 snem ka jingshakri sha ki khynnah skul naduh ba la seng ha u snem 2001 da ki riew Rangbah ka Shnong Pyrnai.

Ha kane ka sngi rakhe ïa ka jingdap 25 snem la ïadonlang ki kmie ki kpa jong ki khynnah skul, Rangbah Shnong, ki nongïalam shnong, ki nonghikai, ki rangbah kiba la ïa donbynta lang ban seng nyngkong eh ïa kane ka skul, ka MDC ka thaiñ ka Kong Grace Mary Kharpuri, ki longkmie ki longkpa bad kiwei kiwei.

Lah ban kdew ba ia ka Jingshai Barit SSA LP School Pyrnai la seng naduh u snem 2001 bad da ka jingtrei shitom bad ka jingbym kynran dien ki riew Rangbah ka Shnong ka la ïaid beit shakhmat ban jam ia u mawmer ba 25 snem ka jingshakri ia ka pule puthi haduh ban ioh ia ka kyrdan b Higher Secondary School ha u snem 2025.

Ha kane ka sngi Kong Grace Mary Kharpuri kaba long ka MDC ka la plie ïa u Mawnongrim ka jingdap 25 snem ka skul bad ha kajuh ka por ka la kyntiew ruh ïa ka Lama.

Kumjuh la pynsngew ruh ia ka history lyngkot ka skul ha ka jingïaid lynti naduh ba la sdang ban seng ha u snem 2001 da u Sir S. Khongsdir, Secretary SMC & Head Teachers L.P.

Haba kren ha kane ka sngi ka Kong Grace ka ai ka jingkitbok kit rwiang ïa kane ka skul ba kan dangkiew shuh-shuh ha ki snem ban dangwan baroh da kaba Khmih lynti ba ka skul kan sa ïoh biang sa ka jingrakhe kiba kham heh kum ka ka jingdap ba 50 snem bad 100 shem ruh kumjuh.

“Ngi dei ban don ka jingïai shah, bad da ka jingïai shah ngi ïohi ruh ba ki nongseng ïa ka ‘Jingshai Barit SSA LP. School Pyrnai’ wat hapdeng ki jingeh hynrei u Blei u khlem iehnoh ban pynïaid shaphrang ban ai ka jingshakri sha ki khynnah skul,” la ong ka Kong Grace.

Ka la ong, ba ka pule ka puthi kan nym lah ban wanrah ïa ki jingkylla ha ka pyrthei hynrei ka pule ka puthi kan wanrah ka jingkylla ïa u ba ïoh ïa ka jingnang ka jingstad, ba un wanrah ïa ka jingkylla ha ka pyrthei hi baroh ka wei. “Ka pule puthi ka dei kaba lah ban rad dyngkhong ïa ka jingduk” kala ong.