Kawei ka jingjia ba sngewsih bad pynduh mynsiem ia ki nongri ngap, ka la jia ha ka thaiñ Khliehmawlieh ba hap hapoh ka Nongstoiñ, ha kaba ki spah tylli ki ksing (synduk) ngap ki long ksing suda namar ka jingïap khlam kynsan ki ngap, kaba la wanrah ka jingduhnong ba khraw ïa ki nongri ngap ha ka thaiñ.
Katkum ka jingïathuh ki katto katne ngut ki nongri ngap, katei ka jingjia ka la sdang naduh ka 16 tarik u Lber 2026, hynrei ha kaba sdang ym shym la don mano mano ba sngewthuh ba ka dei ka jingïap khlam. Ki la mut ba ka jingïap jong ki ngap ka lah ban dei na ka jingjur palat u slap bad ka erïong, ne ka jingkylla kynsan jong ka suiñ bneng kaba wanrah ka jingkhriat.
U Bah Klestar Syiem na ka shnong Khliehmawlieh u la ong ba ha kaba sdang u la kheiñ sting ïa katei ka jingjia, hynrei hadien ba ki ngap ha baroh ki 15 tylli ki ksing jong u ki la ïap lut, u la sngewthuh ba ka dei ka jingïap khlam kaba shyrkhei. U la ong ruh ba u la lap ïa katei ka jingjia kaba shyrkhei ha ka sngi saitjaiñ jong ka taïew.
Ha kawei pat ka bynta, u Bah Charles Kharbani na ka shnong Pyndengdiloiñ u la pynpaw ba ha u snem ba la dep, u la ïoh nong palat 30 hajar tyngka na ka jingdie ïa ka um ngap. Hynrei mynta u snem, baroh 35 tylli ki ksing ngap kiba u la ri ki la ïap lut, khlem sah shuh wat tang kawei ruh, kaba la pynlong ïa u ban mad ïa ka jingduhnong kaba jur.
Ka jingïap khlam jong ki ngap ka la ktah jur ïa ka kam ri ngap ha katei ka thaiñ, kaba dei kawei na ki lad kamai jakpoh kiba kongsan ïa kiba bun ki longïing. Kane ka jingjia ka la wanrah ka jingeh kaba khraw, ym tang ha ka liang ka kamai hynrei ha ka jingïoh jingïarap ïa ka jingim ba man ka sngi.
Haba leit jurip sha kitei ki shnong ba la shah ktah, la lap ha bun tylli ki jaka ba ki ngap ki la shu thiah lyngktar ha madan, bad kiba bun ki la kylla jingbam ïa ki sim bad ki syiar. Don ruh ki nongri kiba la hap ban tep noh ïa ki ngap hapoh khyndew, namar ka jingtieng ioh ka jingïap khlam kan pur sha kiwei pat ki jingri.
Ki nongri ngap mynta ki khmih lynti ïa ka jingïarap na ka sorkar bad na ki bor ba dei peit, khnang ban lap ïa ka daw jong katei ka jingïap khlam bad ban ïoh jingïarap na ka bynta ban pynkhie im biang ïa kane ka kam kaba la ai jingïarap ïa kiba bun.