Palat 708 ngut ki Home Guard yn pynrung sha ka SDRF Battalion

Ia ka jingleh burom ne Raising Ceremony ki 2 tylli ki Battalion ka State Disaster Response Force (SDRF) jong ka Jylla la pynlong mynta ka sngi ha Civil Defence bad home guards complex ha Mawdiangdiang, Shillong.

Ha kane ka sngi Myntri ka tnad Home Guards, u Brenning A Sangma kum u Kongsan ula pynher ia ka lama ka Meghalaya’s State Disaster Response Force (SDRF) ban pynkhlain ia ki ar ki kynhun Battalion.

Haba ai jingkren u Myntri sorkar u Brenning A Sangma ula ong, “Ka Meghalaya ka kynduh jingeh bad jynjart namar ka long lum bad ka jingjur u slap, kaba lah ban ktah na ka jingtwa khyndew, shlei um bad kiwei kiwei ki jingjia na ki bor mariang. Halor kine ki jinglong jingman donkam ban pynkhlain ban ïakhun pyrshah ïa ki jingeh kibalah ban jia ha kano kano ka por.”

U Myntri ula ong kane ka jingthmu ka long kaba donkam namar ïa kine ki kynhun la pynkiew bad pynrung ha ka kynhun Border Wing Home Guards bad kyntu ba kinpyndonkam hok ia ka sap ka talen ryngkat ki jinghikai ba ki ioh ban pynleit jingmut ha ki kam. “Kane ka rukom ym ju pyntreikam ha baroh ki jylla hynrei ka dei ka jingïohi jngai ka jylla ha ka liang ka synshar khadar” u la bynrap.

U la ong ka jingpynkiew ïa ki ar tylli ki kynhun SDRF Battalion ka dei ka sienjam ba kongsan ban pynkhreh bad ban ïakhun ban iada ia ka ri bad paidbah, ki ban long ki atiar pynlait im bad iarap ia kiba shem lanot ha ki bor mraiang.

U Jt. Director Civil Defence bah B Mukhim, ula pule ia ka jingpynbna ka sorkar ban pynrung ia 708 ngut ki Border Wing Home Guards sha ka SDRF Battalion.

Kiwei kiba la ai jingkren ki long u Vijay Kumar Mantri, IAS, Commissioner bad Secretary, Sekretari bad kiwei bad ka donlang u MK Singh, IPS, Commandant General of Home Guards, u DP Marak, IPS, IGP (SB/Borders), u Zenithsky J Sangma, MCS, Inspector General Prisons, u R.P Khongwar bad kiwei.