Ka jingsdang ia ki Medical College ka long kan pynkhlain ia ki lad sumar

Ka Myntri ka tnat ka koit ka khiah ka Kong Ampareen Lyngdoh hynne ka sngi ka la ong ba ka jingsdang noh ia ki Medical College kan pynbha shibun ia ka jinglong jingman ba ia dei bad ki lad jingsumar hapoh ka Jylla. Haba kren sha ki lad pathai khubor ka Kong Ampareen kala ong “Hadien 5-6 snem ngin ym ïakren shuh halor kane ka mat namar ngi la dei ban ïaid shakhmat ha ka liang ka jingïada ha ka koit ka khiah. Ym tang ba ngin sdang noh ïa ka MBBS, hynrei la ai jingmut ruh ïa ngi ban sdang tei iaki jaka sah naka bynta ki Senior bad Junior Doctor, ki Specializations bad MD program”. Ka Kong Ampareen kala ïathuh ba ïa kane ka mat, la ïakren ruh hapoh ka jingïalang Review Meeting jong ka tnat ka koit ka khiah bad la ïakren ruh halor ka jingthungkam ki Doctor Specialists, Contractual bad ki jaka pule Doctor hapoh ka Jylla.

Ka la pynthikna ba ka Sorkar ka dang trei shitom ban thung ïa ki riew shemphang hadien ba la ïoh ïa ki jingmynjur pisa naka Sorkar.“Ngi la sdang ban pynbiang iaki Doctor Specialist haki tnat anaesthesia, paediatrics, surgery, neurology, bad nephrology. Kine ki tnat kidei kiba donkam kyrkieh. Shisien ba la pyndep lut bad ha ka rukom kaba dei, ngin sa pynrung shuh shuh ïa ki riew shemphang” ka la ong.Ka Myntri kala pynpaw ba ki jingpynbna jong ka kynhun Myntri Sorkar kaba dang shen ki ba dang donkam ban bishar bniah, khamtam eh ha kaba ïadei bad ki jingthung kam katkum contractual. Ka la pynpaw ïa ka bynta jong ka University of Science and Technology Meghalaya (USTM) ha kaba ïadei bad ka jingduna ki riew shemphang ha ka liang ka jingsumar.

“Ka USTM ka la dep sdang ïa ka prokram jong ka, bad ngin sa ïoh jingmyntoi shibun namar ba ka Sorkar ka peitngor ïa ki bond ba la ïasoi bad ki. Kane kan buh ïa ngi ha ka kyrdan kaba kham bha shibun,” ka la ong. Haba pynpaw ïa ki jyrwir jyrwat haba iadei bad ki samla pule MBBS naka bhah Sorkar, ka Kong Ampareen kala ong “Ki samla pule MBBS ba la kyrshan da ka Sorkar ki don ka jingkitkhlieh ban wanphai shala ka Jylla ban shakri ia ki paidbah. Ngi ieng ha kata, bad ym don ei ei kaba la kylla. Hynrei mynta ngi donkam ban tip hato ki samla pule MBBS kiba la leit pule ba la kyrshan da ka Sorkar kidei ne em ban soi ïa ka Bond bad ki kolej ba ki Pule”.