Ka Jylla ka don 38 ki skul EMRS ban ai jinghikai katkum ka Course CBSE

U Myntri Rangbah ka Jylla u Conrad K Sangma hynne ka sngi ula plie paidbah ia ka Eklavya Model Residential School (EMRS) ha Samanda, Rikwarenggre, East Garo Hills. Ha kane ka sngi ia donlang u Myntri Sorkar u Marcuise N Marak, u Deputy Commissioner ka East Garo Hills, u Principal ka EMRS, Samanda u Dr M Nandagopal bad kiwei. Kumba long mynta, kane ka skul ka don 130 ngut ki khynnah bad ka la treikam haduh ka VIII bad sa 50 ngut ki khynnah kin rung skul mynta u bnai bad kane ka jaka pule thymmai, ka dei kaba ai jinghikai katkum ki Course ka CBSE ia ki khynnah Scheduled Tribe (ST) ha ki jaka nongkyndong.

Haba kren ha ka jingialang u Myntri Rangbah ula ong, ka pule puthi ka dei ka nongpynkylla ba khraw ia ka roi ka par ha ka Ri bad ka Jylla bad ia ka imlang sahlang bad ka sorkar jylla kan iai bteng ban kynshew tyngka ha ki skul bad ki college ban pynbha.U la pyntip ka Meghalaya ka la don 38 tylli ki skul EMRS bad pynpaw ka jingsngewnguh ia ka Ministry Tribal Affairs bad ia u Myntri Rangbahduh ka ri namar ka jingkyrshan ka sorkar pdeng. U Conrad ula ong, naduh u snem 2018 la sdang ban wanrah ki jingkylla bad la jan 80% ki skul LP bad UP ha Meghalaya la dep maramot ne shna iingskul thymmai bad la nang pynbha ia ka Syllabus ka MBoSE, la pynbeit ia ka rukom pynlong eksam, ka jingwanrah ia ka CM Impact Books ia ki khynnah klas X ka la noh synniang haduh 96% ia ka jingpass ki khynnah ha ka eksam SSLC ba dang shu dep.

U Myntri Rangbah ula pynbna ban bei tyngka na bynta 20 tylli ki computer lyngba ka Chief Minister’s Special Development Fund bad ula kular ban shimkhia ban pyniasoh Telecom bad bthah ia u Myntri ka tnad PHE ban pynbiang ia ka ia ka umbam umdih ha ka jaka pule.