Ka Meghalaya ka la thung 130 ki mawpud ban pyntreikam ia ka MoU pynbeit pud bad Assam: Lat

U Lat ka Jylla CH Vijayashankar ula pyntip ba ka Meghalaya ka la iaid shakhmat ban beit ka jingkajia pud bad ka jylla Assam bad ka pynieng 130 tylli ki mawpud ha ki hynriew tylli jaka ne sector ba la dep iakren pynbeit pud.

“Ka jingthung mawpud ka dei ka sienjam ban pyntreikam ia ka Memorandum of Understanding hapdeng ka Assam bad Meghalaya na bynta hynriew tylli ki jaka ba iakajia pud” ong u Vijayashankar haba ai jingkren hynne ka sngi sdang ka dorbar mang tyngka.

U la ong ka jingphiah ia u pud ban pynbeit hapdeng ka Meghalaya-Assam ka dang iaid sha khmat bad 54 tylli ki mawpud lah thung ha ka thain Hahim bad 83 tylli ha thain Gizang.

U la iathuh ka sorkar ka pynkhlain ia ka jingpeitngor ha ki jaka khappud ka Jylla bad ka Bangladesh ban tehlakam ia ki nongkhaii tuh bad ki kam be-ain.

“Ka Jylla ka pynkhlain ia ki bor pahara ha khappud ka Indo-Bangladesh ryngkat ka jingiatreilang bad ki shipai BSF ban pynkhlain ia ki bor syntiat bad lad pahara” ong u Vijayashankar.

U Lat ula ong ka jingplie dang shen ia ka Counter Insurgency & Jungle Warfare School ha Baghmara kan pynkhlain ia ka jinglah ka Jylla ban ai jinghikai ia ki pulit ban iakhun pyrshah ia ki kam kaikhlaw bad ki kam lehnoh.

U Lat ula pyntip ka jylla ka la pyntreikam lai tylli ki ain thymmai pyrshah ia ki kam bym sniew, The Bharatiya Nagrik Suraksha Sanhita, Bharatiya Nyaya Sanhita bad Bharatiya Sakshya Adhiniyam.