Ka New Shillong Township kan long kum ka enjin pynroi bad kan ai kam palat lak ki samla : Conrad

Shillong, Rymphang : U Myntri Rangbah ka Jylla u Conrad K Sangma ula iathuh ha ka iing dorbar ba ka New Shillong Township (NST) kan long kum ka enjin pynroi bad kan ai kam ia ki lak ngut ki samla ka Jylla.

Haba jubab ia ka mat iatai (Short Duration Discussion) ba la wanrah da u MLA ka Mawryngkneng u Bah Heavingstone Kharpran halor ki jingiaid ki kam pyrnoi ha NST, u Myntri Rangbahh ula ong, la tei ia ka New Shillong kum ka enjin pynroi ka Meghalaya ba la pynieng ha ki saw tylli ki paia kynthup ia ka Tourism, Sports & Culture, Education & Skilling bad Technology bad kine kin khring ia ki karkhana bad ban thaw ki lad ai kam ia palat 1.5 lak ki samla.

U la iathuh ki kam ki la iaid shakhmat ia ki jingtei ia ka sor New Shillong kynthup ka wat banyngkong, ka Administrative City ka ban don ki ophis treikam kum ka Meghalaya Secretariat, IIM Shillong, NIFT, NEIAH bad NEIGRIHMS ka ban pynlong ia ka Knowledge bad Healthcare Hub.

Ula iathuh ka jingtei ia ka Meghalaya Secretariat ba T.1,231 klur ka la dep kumba 35% bad ka Legislative Assembly Building ka dei ba la jan dep artad bad kane ka thaiñ kan sa kylla ruh kum ka jaka iathied lyngba ka Unity Mall (dep 40%) bad ki surok ban don ki dukan ba la pynkhreh bha ia ka Plan.

U Myntri Rangbah ula iathuh haduh 64.9 akar ka jaka la buh ban shna ia ki jaka pule ha ka Higher Education bad Skilling bad ka IT Park ka la lah ban pynmih haduh 1500 tylli ki kam, katba ka Plan shna ïing ka kynthup ia 51.68 akar ban tei ia ki iingsah bad 10.9 akar ia ki iingsah ba jem dor (435 unit).

Ha kaba ia dei bad ka wat ka Baar ha Mawkhanu, kan don ka IT park ba heh, ka Skill & Innovation Hub, Monolith Tower bad ka Football Stadium ka ban don 40,000 ki jaka shong peitkai bad kine ki jingtei kin wanrah ia ka ioh ka kot bad kin ai kam ai jam.

U Conrad ula iathuh ka jingpyntreikam ia kane ka projek ka sorkar ka buh hakhmat ban pynneh ia ka mariang bad la mang 85.9 akar na bynta ki Park ban ai kam ia ki samla

U la iathuh ka Town bad Country Planning skhim kin ia don bynta bad ki Dorbar Shnong bad ki nongshong shnong ha ka jingplan ia ki kam pynroi bad la buh hakhmat ki lad ban pynbiang umbam bad bording ilektrik.