Ka Nongpyndeng-Mawkynjoin ka hap ha sor Nongstoin hynrei kam pat ioh surok rong

Kawei ka bynta jong ka surok ba don ha Mawkynthait Ñiangbri, kaba hap hapoh ka shnong Mawkhlam-Nongppyndeng, ka surok ban leit sha Mawkynjoiñ haduh mynta ka dang sah ha ka jinglong surok khyndew wat la katei ka thaiñ ka dei kaba don hajan ka sor Nongstoiñ.

Ka jinglong jong katei ka surok ka la pynlong ïa ki nongïaid lynti ban ïakynduh jingeh shibun, khamtam eh ha ki aïom slap ha kaba ka surok ka dap da ka ktieh, ka um bad ka khohruh khohram. Ki khynnah skul kiba wan na ka shnong Mawkynjoiñ ban leit skul ki long kiba shah ktah jur namar ki hap ban ïaid lyngba ka ktieh bad ka um man ka sngi.

Katkum ka jingïathuh ki riew rangbah ka shnong, ka jingjngai jong katei ka surok ka long tang kumba katto katne Kilometer eiei na ka surok rong kaba pynïasoh sha kawei pat ka surok kaba biang. Hynrei, la ong ba naduh ba la sdang shnong haduh mynta ym pat ju don ki kam pynroi ne jingsiang rong ïa katei ka surok wat tang shi sien ruh.

Uwei u nongñiah kali kit paidbah uba ju ïaid lyngba katei ka surok u la pynpaw ka jingsngewkhia kaba jur, da kaba kynnoh ba ka jingïoh jingïarap na ki bor ba dei peit ka jngai palat na ka bynta katei ka shnong. U la ong ruh ba wat u MLA jong ka Nongstoiñ Constituency um pat ju shimkhia wat hadien ba la ju leit ban kyrpad na ka bynta ban pynbha ïa katei ka surok.

Na ka liang ka samla Lilimary Rngaid, kaba dei ka nongshong shnong ka Mawkynjoiñ bad kaba ju ïaid man ka sngi da ka thuk-thuk lyngba katei ka surok, ka la pynpaw ka jingsngewkhia bad ka la kyrpad ïa u MLA jong ka thaiñ ba un shimkhia mardor ïa ka jinglong jingman kaba sniew jong katei ka surok.

Ki paidbah nongshong shnong mynta ki la kyrpad jur ïa ki bor sorkar ba kin tuklar noh mardor ban pynbha bad siang rong ïa katei ka surok, na ka bynta ban pynduna ïa ka jingeh kaba ki paidbah ki ïakynduh man ka sngi.