U Bah PT Sawkmie, MLA barim u ong ba ka jinghiar ka Performance Grading Index (PGI) halor ka pule dangle ka dei shibynta ka jingkhuslai jong ki nongshong shnong ka jylla Meghalaya baroh kawei. “Ka jylla Meghalaya ha ki por kiba mynshwa ka la long kawei na ki jylla ba ki jaka pule ki long kiba bha tam hapoh ka Thain Shatei Lammihngi bad ki bynta ka ri India, hynrei mynta sngew synei ia la ka jong ka jylla bad ka Shillong,” ong u bah Sawkmie. U bah Sawkmie u la buh jingkylli, “Kum ki nongshong shnong kiba la pynlong ia ka jylla Meghalaya kumne kumba ka long, hato ngin shu sngap, ngin shu ia kdew kti, ngin shu ia kynnoh ia ka sorkar kaba rim bad ka sorkar kaba mynta ka biang mo.”
“Kum ki nongshong shnong kiba don ka jingkitkhlieh ia la ka jylla ngin kmen haba ngi iohi ba ka kiew bad ngin khuslai haba iohi ba ka hiar,” bynrap u bah Sawkmie. AU ong ruh ba kane ka dei ka por ba ki educationist ne ki riewshemphang ha ka pule puthi jong ka jylla kin iarap lem ban ai jingmut sha ka sorkar ban kyntiew pat ia ka education ne pule puthi hapoh ka jylla.
“Ngi don ka jingkyrmen ba lada ki riewshemphang ki iamir jingmut lang kawei ban kyntiew ia ka pule dangle ha ka jylla, sa shisien ka nam bad ka burom ka Meghalaya kan sa paw biang,” pynkut u bah Sawkmie.