Ka Ri Bhoi ba dap da ka dud bad ka ngap, hynrei ki nongrep mynta ki mad ia ki jingeh

Kum shibynta ban kynmaw burom ïa ki jingtrei shitom jong ki Nongrep mynta ka sngi ka kynhun ki Nongrep hapoh ka shatri jong ka Hill Farmers Union ka la rakhe ïa ka sngi jong ki Nongrep lane ka Farmers Day na ka bynta ki Nongrep jong ka Dong ka thaiñ Umden ïa kaba la pynlong ha Umden Nongtluh Parish Hall, Umden. Ha kane ka sngi kyrpang ki Nongrep la don lang u MLA ka Nongpoh u Bah Mayralborn Syiem kum u kongsan ha ka jingiadonlang u Bah Eric Kevin Dkhar BDO ka Umling Block kum u Symbud Kongsan, U Pranjal Dutta District Hurticulture Ophisar Ka Ribhoi, Ka kong Serolyne Chyne, District Agriculture Ophisar ka Ribhoi, U Bah Alfonbirth Kharsyntiew General Secretary ka Hills Farmer Union Sengkmie, Bah Ronald Khongjoh President ka HFU Ri Bhoi lem bad kiwei kiwei.

U MLA ka Nongpoh, u Bah Mayralborn Syiem haba kren ha katei ka jingialang, u ong ba ngi dei ban kynmaw burom ia kane ka sngi kaba dei ka sngi kyrpang jong ki nongrep namar ba dei lyngba ka jingtrei shitom jong ki kaba pynioh ïa ngi ia ki jingbam jingdih kaba man la ka sngi.

U la ong ruh, Ba Ngi don ha ka Ri kaba dap da ka dud bad ka Ngap ba la kyrpang da u Blei, hynrei namar ka jingleh bym suitñiew da ki briew mynta ka Jingsboh jong ka khyndew ka la sdang duh, bad kum u Nongmihkhmat u iohi ia ki jingeh jong ki nongrep ba ki mat ha kiba bun ki liang la ka dei haka jingshah pynjot ki Jingthung jingtep, Haka ïew ka hat, ka Jingshah khñion dor ki mar rep bad kiwei kiwei, hakaba u la pyn paw ba kum u MLA un sa rah khnang ka kane ka mat ban kren ha iingdorbar thaw aiñ hakaba ïa dei bad ki mat jingeh kiba ki Nongrep ki jumat na kapor sha kapor.