U MP ka Lok Sabha na Shillong u Dr. Ricky AJ Syngkon ula ong ba ka Voice of the People Party (VPP) naduh ba sdang ka la ong ba kan weng lut ia ki khyrdop khrong khajna kiba beain, hynrei ym ia baroh ki khyrdop kiba iaid katkum ka ain. Haba kren sha ki lad pathai khubor hynne ka sngi, u MP ula ong, ” Ka party naduh ba sdang ka la kren shai ba ia ki khyrdop beain, ngin weng”.
U Dr. Ricky uba dei ruh u General secretary ka VPP, u la ong ba ka party ka la ong ba hap ban weng ia kino kino ki khyrdop kiba beain bad kam mut ia kito kiba iaid katkum ka ain, namar ba la buh khnang ban pynmih khajna na ka bynta ka jingdonkam ka Council. Ula ong ba kaba sngewsih ka long ba ki don ki khyrdop sorkar jylla ha War Jaintia, kim shym la khrong katkum ka dor ba la buh hynrei ki la shu khrong beain.
“Ki don ki khyrdop ka sorkar jylla sha War Jaintia, kim khrong katkum ka dor ba la buh T. 200 hynrei ki khrong haduh T. 800 kum kane ka dei ka kam beain,” ong u Dr Ricky. Lah ban kdew ba ka KHADC dang shen ka la takhuh bad ka bor district ka Ri Bhoi hadien ba ka la shah khang noh ka khyrdop khrong khajna tang shi sngi ba ka la pynieng ha Umdihar.