Ki jingpynlut ka sorkar ha ki kam pynroi kam don jingmut lada ki paidbah kim ioh jingmyntoi: Conrad Sangma

U Myntri Rangbah ka jylla u Conrad K Sangma ula ong ba ki kam pynroi kim lah ban tyllun lada kam don ka sorkar ne ka sain pyrthei kaba skhem.Ia kane u la ong haba kren ha ka jingrakhe dap 8 snem ka sorkar Meghalaya Democratic Alliance (MDA) ha ka jingbat ia u lakam ka synshar ha ka jylla naduh 2018.Ka sorkar ka la rakhe kyrpang ia kane ka sngi ha madan Polo, Shillong ha kaba la wan iashim bynta ki briew na kylleng ki jaka kiba la khot sha kane ka jingialang.Haba kren ha kane ka sngi, u Myntri Rangbah u la ong ba ha kine ki phra snem ba la leit, tang ha Khasi-Jaintia ki don haduh 1526 tylli ki projek la sdang bad la pyllut kumba 21,278 klur tyngka ha ki tnad bapher bapher.Ula ong ka sorkar hapoh ka Prime Programme ka la kyrshan ia ki briew ba treikam lajong bad ka la pyllut kumba T.32.7 klur ha ki san snem, ha ki Homestay Sector la pyllut kumba T.136 klur ban kyntiew ia ka kam jngohkai, hapoh ka Meghalaya Grassroot Music Programme ka sorkar ka la pyllut kumba T.40 klur sha ki 7000 ngut ki nongrwai nongtem ka jylla.

Hapoh ka CM Scholarship ha kine ki khyndiat bnai, la pyllut kumba T.60 klur ban sam mar T.6000 hajar sha kumba 1 lak ngut ki khynnah, na ka FOCUS plus la pyllut T.150 klur, CM Elevate T.146 klur, hapoh ka LIFCOM la noh jingiarap sha ki nongrep kumba T.50 klur. U la ong ba ki kam pynroi ki jingpyllut pisa ka sorkar, kim don jingmut lada ki paidbah kim ioh jingmyntoi.U la ong ba kin don ki briew ki ban sa ther ia ka sorkar balei ka pyllut pisa ia ki tamasa, hynrei ka sorkar kam shym la pyllut pisa ha ki tamasa da kaba iapein noh ia ki nongrep ne ia ka koit ka khiah ne ki samla pule. Namarkata ka sorkar jylla ka kwah ban iatrei bad ki nongialam shnong khnang ban kyntiew ia ka jylla.

Ha kane ka sngi, u Myntri Rangbah ula sam ia ka cheque kaba T.6.04 klur hapoh ka skhim FOCUS+ sha ki 1.05 lak ngut ki nongioh myntoi, Green Meghalaya+ T.24.54 klur la sam sha ki 5994 ngut ki nongioh myntoi, la sam ruh ia ki cheque bad ki work order hapoh ka CM Elevate kaba mar T.76 lak.Ha kane ka sngi, la ioh ruh ia ka jingkren na u MLA ka Umsning u Dr. Celestine Lyngdoh, u myntri ka tnad ka rep ka riang u Timothy D Shira.