Ther u phria bad ‘eriong ha SWKHD, julor 68 tylli ki iing bad 4 tylli ki skul

Ka ‘eriong ba jur ha ryngkat u phria mynta ka sngi ka la lynshop ia ki shnong bapher bapher jong ka South West Khasi Hills District ha baroh ar tylli ki Block, kata ha Mawkyrwat bad Ranikor C&RD Block ha kaba 68 tylli ki iing bad 4 tylli ki skul ki la julor bad ktah ruh ia kumba 323 ngut ki briew, hynrei donbok ba ym shym la don kano kano ka jingjia ba sngewsih.

Ki tyllong khubor na ki bor sorkar ki la pyntip ba katei ka jingjia ka la jia ha ka por kumba 4:00 – 5:00 mynstep ha kaba ka ‘eriong ryngkat u phria ki la lynshop ia kumba 26 tylli ki shnong kiba hap hapoh ka Mawkyrwat C&RD Block bad 2 tylli ki shnong kiba hap hapoh ka Ranikor C&RD Block ha kaba ka la pynjulor ruh ia ki iing ki sem bad ki skul.

La iathuh ba ki babun ki iing kiba la shah pynjulor da kaba ka eriong ka la lit noh ia ki tnum iing bad ki la don ruh ki jingjia ha kaba ka eriong ka la jynret ia ki tynrai dieng ne pyndkut ia ki tnat dieng ba heh kiba la hap bad pynjulor ia ki iing.

Ki tyllong khubor ki la pyntip ruh ba ki don saw tylli ki skul kata ka Mawphanrang LP School, Laitlawsnai RC LP School, ka Umdohlun COG Secondary School bad ka Rymmang Secondary School kiba la mad ia ka jingjulor kaba jur ha kane ka jingjia.

Ki tyllong khubor ki la ïathuh ruh ba ki shnong kiba la shah ktah jur ki kynthup ïa ka shnong Manad, Mawbidong, Mawjarain, Nongbah Marshillong, Nongnam bad Nongbrei-Nongdom, baroh ki hap hapoh ka Mawkyrwat Block.