Kynnoh ba shah ktah kti ki nongtrei byllaKhang syndet ka kompeni ïa ka project pynmih bording ha ka stage III, Ri Bhoi

Ka la long shisha ka jingduhnong kaba khraw ia ki trai shnong bad ki nongshong shnong kiba dei ki khasi hadien ka jingkhang syndet ka kompani kaba pyntreikam ia ka project pynmih bording ha ka stage III, Ri Bhoi District hadien ba la kynnoh ba la don ka jingshah shoh shah dat jong ki nongtrei bylla naduh ki bar jylla bad katto katne ki khasi ha ki dkhot sengbhalang kaba la jia ha ki khyndiat sngi ba la leit noh.
Halor kane ka jingjia shah ktah kti ki nongtrei bylla khamtam ki nongtrei bylla kiba dei ki khasi, na ka liang ki ar tylli ki Dorbar Shnong ba kynthup ia ka Nongdiengngan bad ka Nongmahir ki la pynpaw ia ka jingsngewkhia kaba jur halor ka jingktah kti ki dkhot kawei ka sengbhalang ia ki nongtrei bylla khamtam kiba dei ki khasi bad halor ka jingkhang jong katei ka project da ka kompani kaba pyntreikam kaba la ktah ruh ia ka kamai jakpoh jong ki nongshong shnong bad kiwei kiwei.
Na ka liang ki katto katne ngut ki nongtrei kiba dei ki khasi kibaa la shah ktah na ka jingkhang noh ia katei ka project pynmih bording ha ka stage III, ki la pynpaw ia ka jingsngewsih kthang namar ba kim ioh shuh ia ka lad ban trei ban ktah bad ruh ka jingbym ruh wat ia ka bainong trei kaba ki la dep ban trei da ki taiew namar ka kompani kaba pyntrei ia ki kam ka la pynsangeh lut ia ki kam ki jam baroh.
Ki la iathuh ruh, ba ka jingwan jong katei ka project ka la wanrah shisha ia ka jingkyrkhu namar ka jingnang pynheh ia ka rukom sam bording hapoh ka jylla hi baroh kawei khamtam ka jingai kam aijam ia kiba bun ki nongshong shnong, ki nongshong dukan bad kito kiba don ruh ia ki kali kiba aiwai sha katei ka kompani, hynrei namar ka jingjia shah ktah kti jong ki nongtrei bylla ha kane ka project ha ki dkhot sengbhalang ka la wanrah pat ia ka jingpynsajia ia kiba bun namar ka jingkhang noh ka kompani ban pyntrei ia katei ka project.
Na ka liang u Bah Dip Thangkhiew, Rangbah Shnong ka Nongdiengngan bad u Bah J. Thangkhiew, Secretary ka Nongmahir, ki la pynpaw ruh ia ka jingsngewkhia kaba jur halor katei ka jingjia kaba la ktah ia ki nongshong shnong kiba trei bylla ha katei ka project ha ka stage III, da kaba ong ruh ba kim don ka jingpyrshah halor ka jingkhynra kot sla da ki kynhun sengbhalang ha kino kino ki project ba don ki nongtrei bar jylla hynrei kum ki nongialam sengbhalang ki la dei ban kynjoh ktien ne ia treilang bad ki Dorbar Shnong ban lait na kino kino ki jingjia kiba ktah ia ka shongsuk shongshngaiñ hapoh Shnong poh thaw.
Ki la pynpaw ruh, ba tang namar katei ka jingjia shah ktah kti jong ki nongtrei bylla kiba nabar jylla bad wat ki khasi ka la ktah pat ia kiba bun namar ka jingkhang noh ka kompani ban pyntrei ia katei ka project, ha kaba na ka liang ki ar tylli ki Dorbar Shnong ki la kyrpad ruh ia ki bor ba dei khmieh ban shimkhia halor kane ka kam khnang ba ka jingpyntreikam ia kane ka project kan sdang biang bad kan pynmyntoi ia ki nongshong shnong ka district bad ka jylla hi baroh kawei.