Kynnoh u Dr.Mukul ba thok ka NPP ïa ki paidbah halor ka Resolution ILP

U Nongialam ka Liangpyrshah u Dr Mukul Sangma hynne ka sngi ula kynnoh baka Sorkar Jylla ba ïalam daka National People’s Party (NPP) kala thok iaki paidbah daka ba ïalam bakla halor ka Resolution dawa pyntreikam Inner Line Permit (ILP) hapoh Meghalaya. Ïa kane u Nongialam ka Liangpyrshah ula kynthoh haba pynpaw ka jingsngewdiaw halor ka jingiai leh atlukhi ka Sorkar Jylla ban pyntreikam iaka ain Meghalaya Residents Safety and Security Act (MRSSA) ban tehlakam bad pyrkhing iaka jingwan rung ki briew shapoh ka Jylla. Haba kren shaki lad pathai khubor u Dr Mukul Sangma ula ong ba ka Sorkar Jylla ba mynta hashuwa ban mynjur iaka Resolution kala dei ban ïakren pynbeit shwa bad ka Sorkar Pdeng namar ka rai ban ai ILP iaki Jylla ka shong haka Parliament ym haki Ingdorbar Thaw ain ki Jylla. U Dr Mukul ula ong ba ki don katto katne ki ain ba donkam jingmynjur naka Parliament hashuwa baka Sorkar Pdeng kan ai jingmynjur ban pyntreikam hapoh ki Jylla jong ka Ri bad dei namar kane haka por ba u bat iaka shuki Myntri Rangbah, u khlem kular ban pynioh ILP ha Meghalaya.

Ula ong ba haki por ba u don haka bor synshar, ka jingïakhih ki paidbah bad ki kynhun sengbhalang ban dawa ILP kala pynlong ïa u ban iamir jingmut bad baroh ki kynhun hynrei kum u Myntri Rangbah u tip ba kam dei kaba suk ban pynbor iaka Parliament ne iaka Sorkar Pdeng.“Haka por ba nga bat iaka shuki Myntri Rangbah nga khlem kular ban pynioh ILP iaka Jylla namar nga tip, ngam lah ban pynbor iaka Sorkar Pdeng ban mynjur ban pyntreikam ILP hapoh Meghalaya namar ki don katto katne ki ain, ha kaba ka IIngdorbar Thaw ain ka Jylla kam lah ban iaid lait iaka Parliament ne iaka Sorkar Pdeng” la ong u Dr Mukul. U Dr Mukul ula ong ba kum u nongialam iaka Sorkar Jylla haki snem bala leit ula ioh ka lad ban iamir jingmut bad ki kynhun bapher bapher bad kane ka pynlong iaka Sorkar Jylla ban wanrah daka MRSSA 2016 kaba dei ka ain kaba khlaiñ ban tehlakam bad peitngor iaka jingwan buhai shnong ki bar Jylla.

Ula ong ba ka MRSSA ka pynkupbor bad ka ai bor katkum ki kyndon ain iaki Rangbah Shnong, ki Nokmas ban leh iaka ba donkam ban tehlakam iaka jingwan bushai shnong ki bar Jylla hapoh ki shnong ki thaw. U Nongialam ka Liangpyrshah ula kynnoh ba ka jingpynslem ka Sorkar Jylla ba mynta ban pyntreikam hok iaka MRSSA kadei namar ba ka kwah ban khring iaki nongkhaii bar Jylla ban wan kjit iaka spah ka phew jong ka Jylla, ka Sokar ka kwah ba ki Company bar Jylla kin wan sengkam hapoh ka Jylla tang ban ioh nong ki heh kiba don haka bor ba kiba ithuh iaki heh Sorkar.