Ai jinghikai ka FSSAI ïa ki khynnah skul, ban ithuh ïa ki jingbam ba bha bad ba sniew

Kum shi bynta ban pynsngewthuh bad pynshai ia ki nongshong shnong ka Jylla khamtam iaki khynnah skul ban kiar na ki jingbam kiba la sah ne kiba la sniew, ka tnat Food Safety and Standards Authority of India (FSSAI) hynne ka sngi ka la pynlong da ka jingai jinghikai kaba kyrpang ia ki khynnah skul jong ka Army Public School Happy Valley. Kane ka program kadei naka bynta ban ialap halor ka jingdonkam ban ithuh iaki jait jingbam kiba lah ban wanrah bun jait ki jingshitom iaki ba bam.Ha kane ka sngi la hikai ruh ai ki khynnah ba kin nang kumno ban test, kumno ban ithuh ia ki jingbam kiba dang long ban pyndonkam lane ban bam bad kino pat ki jait jingbam kiba lah buh jingma kylla ia ka koit ka khiah jong ki nongbam.

Ki khynnah skul hadien ba la ioh ia ka jinghikai, ki la pyni paidbah ruh kumno ban ithuh lada jia ba la khleh lang da kiwei pat ki jingkhlieh ha ki song sohmrit lane ki musli musla ba ju die ha ki iew ki hat.Naka liang ka Asst Commissioner FSSAI ka Kong DBS Mukhim ka la iathuh ba lyngba kine ki prokram ki ioh ia ka lad ban pynphriang ia ka jinghikai bad pynsngewthuh ia ki khynnah skul ba kin tip shaphang ki jait jingbam kiba shngain ban bam.“Dei ban kiar na ki jingbam khutia ne ki jingbam ba ju die ha ki rud surok bad ki jaka paidbah namar kine ki dei kiba buh jingma haduh katta katta ia ka koit ka khiah namar ym tip kiba kumno ki khleh lane ka umphniang kaba ki pyndonkam ka dei kaba dang khuid ne kumno bad kiwei kiwei,” ka la ong.

Shuh shuh ka ong ruh ba ka jingbam kyrni ia ki jingbam khutia ka long ruh ka dawbah kaba wanrah ia ka jingpang diabetes, ka jingpang hypertension bad ruh wat ka jingpang heart attack. Kane ka heh sorkar ka la pyntip ruh ba na ka liang ka tnad ki buh thong ban leit pynsngewthuh sha kylleng ki distrik jong ka jylla la kumno kumno ar tylli ki skul sorkar ha kawei kawei ka distrik.