Leit jngoh ka NPWF ia ka khynnah ba shah dung injekshon

Ka National Peoples Womens Front (NPWF) ka la leit iakynduh ia ka khynnah kynthei kaba don hapdeng ka jingshah sumar hapoh Dr H Gordon Roberts Hospital hadien ba ka la shah dung da u injekshon ha ki runar ha ka sngi Nyngkong kaba la jia hajan ka ophis treikam jong ka Bible Society of India kaba don ha Jaiaw Pdeng. Ka NPWF hapoh ka jingialam ka President ka Kong Grace Mary Kharpuri kaba long ruh ka MDC jongka Khasi Hills Autonomous District Council KHADC, kila kitbok kitrwiang ia kane ka khynnah kynthei ba kan ioh noh ia ka met kaba koit ba khiah bad kila ai jingiarap da ka song tyngka khnang ba yn ioh ban pyndonkam ha ka jingshah sumar.

Haba iakren bad ki nongpathai khubor ka Kong Grace Kharpuri kala ong, “Ma nga bad ka NPWF hi baroh kawei, ngi dap da ka jingsngewkhia ba ka khynnah kaba dang rit kala shah thombor da kaba shah dung da u injekshon, ia kaba ym pat ju jia koit ha kane ka jylla. Ngim tip don aiu hapoh une u injekshon bad kaei ka jingthmu ka jong kitei ki runar. Ngi pynrem jur ia kine ki runar kiba leh ia kane ka kam sinew bad kane ka jingthombor ka jingki ka long ka bym iahap satia”. “Nga kyrpad rit ia ka sorkar bad ia ka tnad pulit ba kidei ban shimkhia bad ban kem mardor ia kine ki runar bad ban ai da ka jingsneng kaba khraw bad kum kane ka jingjia kam dei shuh ban wan jia biang” ong ka Kong Grace Kharpuri bad ka pynpaw ruh ia ka jingsngewkhia halor ka jingjur ki kam thombor pyrshah ia ki kynthei bad ia ki longkmie.

 “U droks ula jyllei shaba palat ha kane ka jylla jong ngi, dei ban shim ia ka sienjam kiba tyngeh bad hap ban wad ia ki lad ki lynti, ba kumno une u droks u ioh ban rung ha kane ka jylla ka jong ngi. Kala dei ka por, ka ïa, ka jong ngi baroh khoit ba ngin ia iengtylli lut naduh ki nongshong shnong, ki nongmihkhmat, ki sengbhalang ban rat dyngkhong syndon ia u droks uba la pynjot pynpra ia ki longiing longsem bad ia ka jylla” la ong ka Nongialam ka NPWF.