Ia kynduh u MDC Laban ia u Myntri sorkar, dawa jurip ia ka jingtei Shillong Ropeway

U MDC ka Laban Mawprem Constituency Bah Ricky Shullai hynne ka sngi ula leit iakynduh ia u Myntri ka Kam Jngohkai ka jylla u Bah Paul Lyngdoh bad dawa ban jurip halor ka jingtei ia ka Shillong Ropeway Project khamtam namar ka jingkynnoh ba la pynkhyllem ia ki dieng hajan ki jaka ba don ki tyllong um ne Catchment Area. Ha kane ka jingiakynduh u Bah Ricky Shullai ula aiti ruh ia ka dorkhas ha u Bah Paul Lyngdoh.Haba iakren bad ki nongpathai khubor, u Bah Ricky Shullai ula ong ba watla kane ka projek ka la ioh ia ka jingkyrshan na ki nongshong shnong, hynrei dang shen ka jingpynkhyllem ia ki dieng hajan ka ‘Catchment Area’ ka la pynmih ia ka jingsngewkhia ha kaba ia dei bad ka jingpynneh pynsah ia ka tyllong um bad ka jingshah ktah jong ka mariang.

“Watla kane ka projek ka ioh ia ka jingkyrshan jong ki paidbah ba bun, hynrei ka jingpynkhyllem ia ki dieng kadei kawei pat ka mat kaba kiba bun ki pynpaw ia ka jingsngewkhia ia ka jingshah ktah ka mariang,” la ong u Bah Ricky Shullai bad ka bynrap ba ki paidbah ki pdiang sngewbha ia ki kam pynroi bad ia katei ka projek ban wanrah ia ka jingkylla ia ka kamai kajih jong ki nongshong shnong khamtam ia ki samla ha kane ka juk mynta.Une u MDC ula ong, ba ki paidbah kane ka thain kila ai iaka jingkyrshan ia kane ka projek naduh u snem 2022 bad la iasoi ruh ia ka jingiatehkular hapdeng ka Sorkar Jylla bad ka Riat Laban Durbar Pyllun bad kane ka projek ka long kaba kongsan bha bad kadei ban iaid shakhmat tangba kadei pat ban iaid ha ka lynti kaba khuid ba suba bad kaban burom ruh ia ka jingsngewkhia jong ki shnong.

Ula ong, ba ula kyrpad ia u Myntri Sorkar ban pynlong ia ka jingjurip lang bad baroh kiba donbynta lang ha ka kam, kaba kynthup ia ki Dorbar Shnong, nongialam shnong bad ka tnad jngohkai, khnang ba kane ka projek kan lah ban iaid ha ka lynti kaba khuid ba suba bad da kaba buh lang ia ka roi ka par bad ka jingiada ia ka mariang.Ha katei ka dorkhas, u MDC ula kyrpad ia u Bah Paul Lyngdoh uba khmih ia ka Tnad Textiles ban ai jaka ban buh ia ka Fire Service Station ha Mulberry Seed Production Centre kaba don ha Lawsohtun kaban long ka jingmyntoi ia ki paidbah ha ba mih kino kino ki jingjia jong ka jingpluh ding bad khamtam haba kane ka Fire Service Station kan don hajan jongka Ropeway Project.