Mih ka VPP kum kawei ka seng saiñ pyrthei kaban ïaknieh thaw Sorkar

U nongialam ka United Democratic Party (UDP) u badei ruh u MLA West Shillong constituency u Bah Paul Lyngdoh u la kam baka Voice of the People’s Party (VPP) ka la mih kum kawei ka seng sain pyrthei kaba iaknieh ban thaw Sorkar hadien ka ilekshon MLA 2028.
Wat la ka ilekshon MLA 2028 ha Meghalaya ka dang jngai sa kumba ar snem shiteng tam hynrei u nongialam ka UDP u la kubur baka VPP kala paw mynta ba kan iakhun tyngeh ban ioh bat iaka bor hadien ka ilekshon.
Haba kren shaki lad pathai khubor u Bah Paul u la ong ba ym don ba lah ban len ia ka bor jong ka VPP bad ka jingphaikhmat jong ki paidbah sha kane ka Party thymmai.
“Ka VPP ka la mih kum ka kynhun kaba khlain tam kaba lah ban wan knieh wat ia ka bor synshar ruh. Ym don jingartatien halor kane” la ong u Bah Paul.
U Bah Paul u la ong ba kiei kiei baroh haba ïadei bad ka sain hima jong baroh ki Party hapoh Meghalaya kin sa paw bha hadien 2027.
Haba kren halor ka jinglong jingman hapoh ka UDP, u Bah Paul u kyntu ia ka party ba ka donkam ban wanrah ka jingkylla kaba khraw lada ka kwah ban iaineh ha ka bor.
U Bah Paul u la pynpaw ia ka jingsngewkhia halor ka rukom treikam hapoh ka UDP. “Ka UDP ka donkam ban long kaba 100% Democratic ym kaba shu synshar tang na jrong” u la ong.
“Hangno ka don ka synshar paidbah (Democratic)!lada ki nongtrei ba shitrhem bad ki nongialam ba rangbah jong ka Party kim ioh bynta ha ki kam ne ban shim rai ba khraw hala ka jong ka Party? u la buh jingkylli.
U Bah Paul u la pynkut da kaba ong ba kane ka jingkren jong u kam dei na ka bynta ka jingbit jingbiang shimet, hynrei ka long na ka bynta ka bha ka miat jong ka Party bad ka Jylla hi baroh kawei.