Mih noh u MLA barim ka Rambrai na NPP, thaw da ka United People Forum

U MLA barim ka Rambrai Jyrngam Constituency, Bah Kimfa Sidney Marbaniang, ryngkat ki nongkyrshan ba hakhmat ki la pynbna paidbah ïa ka jingïamih noh na ka seng National People’s Party (NPP). Ïa kane ka rai la shim hadien ka jingïatai sani bha ba la long ha ka jingïalang ha ïingsah jong u Bah Kimfa ha Rambrai.
La ïathuh katei ka jingïalang ka dei tang ka jingïalang hapoh ka kynhun ba la wan ïashim bynta da ki katto katne ngut ki nongïalam bad nongkyrshan bad shen yn sa pynlong ïa ka jingïalang paidbah ban dang ïatai sani shuh shuh halor ka lynti saiñ pyrthei nangne shakhmat, namar haduh mynta ka kynhun kam pat shim rai la kan leit ïasnoh bad kano ka seng saiñ pyrthei.
Ha kajuh ka por, katei ka kynhun ka la thaw ruh ïa ka “Rambrai Jyrngam United People Forum” kaba long kum ka rynsan paidbah ban pynïasnoh lang ïa ki nongkyrshan jong u Bah Kimfa shipor. Hynrei, haduh mynta ka forum kam pat shim rai ïano yn kyrshan ha ka MP election shiteng samoi kaban wan.
Haba kren sha ki lad pathai khubor, u Bah Kimfa Marbaniang ha ryngkat ki dkhot jong ka forum, ki la ong ba watla ka long ha kano kano dur jong ka jingïaid lynti ka saiñ pyrthei, hynrei ki la rai skhem ban mih madan ha ka election MLA 2028, bad u Bah Kimfa Sidney Marbaniang u lah ban ïakhun wat kum u kyrtong shimet lada donkam.
Ha katei ka jingïalang, la thung ïa u Bah Kimfa Sidney Marbaniang kum u Chairman jong ka forum bad ïa u Samla Kitborlang Lyngdoh kum u Secretary.
Ha kajuh ka por, baroh ki nongkyrshan u Bah Kimfa ki la aiti ruh ïa ka shithi ïamih paidbah (mass resignation) na ka seng NPP.