Naduh khynnah sdang thain Jingkiengjri u Rangbah Shnong Siej

Ka long kaei kaba ai mynsiem bad da ka jingthmu ban wanrah jingmyntoi ia ki nong Shnong, u Rangbah Shnong ka Shnong Siej, u Bah Hally War ula thain hi ia ka Jingkiengjri lane ka Living Root Bridge. Kane ka Jingkiengjri lane ka Umkar Living Root Bridge ka don hapoh ka shnong Siej ka ba don hapoh ka thain Shella Bholaganj Block East Khasi Hills. Ka shnong Siej ka don kumba 20-25 tylli ki longing bad ki nong shong shnong ki im daka rep bad mynta ka kynti, ka shnong kala sdang khring bha iaki nong wan shang kai pyrthei namar ka jingdon ka Umkar Living Root Bridge, ki ksaid. Haba iakren bad u Bah Hally War, u la iathuh ba naduh ba u dang khynnah, kum kiwei ki nong shong shnong, u ju iaid na kane ka lynti ban leit sha ja ja rep hynrei haka por lyiur, ka long ka ba jynjar bad syier mynsiem ban kam na shilliang sha shilliang.

U la iathuh ba ki riew tymmen ha ka por ba u dang rit ki la shna kynja jingkieng da ki siej hynrei man ka por lyiur, ka jingkieng ka shah rong noh bad ka um bah. “Ngam kynmaw hynrei nga lah thain ia kane ka Jingkiengjri naduh ba nga dang khynnah tharai nga lah don 10-12 snem” iathuh u Bah Hally. U la ong ba naduh ba u la sdang thain ia ka Jingkiengjri um ju pep ban sumar daka peit thuh ia ki thied dieng ba kin iaid ha ki jaka ba dei ban iaid khnang ban skhem bad im ka Jingkiengjri.

U Bah Hally ula ong ba wat la 40 snem tam ruh u dang ialeh ban pynbha ia ka jinkieng bad kane ka Jingkiengjri kan neh da ki spah bad hajar snem. Haba kylli, u Bah Hally u la iathuh ba u ioh jingmut ban thain Jingkiengjri namar ki riew tymmen ki ju ialap khana halor ka jingkhlain ki dieng jri.