Aiti u MLA ia ka ‘work order’ ban shna madan ialehkai ha Umpung

U MLA ka Ranikor, u bah Pius Marwein ha ka 10 tarik Jymmang 2025 u la aiti ia ka work order kaba T.33,73,600/- sha u Bah Phaining Thongni, President ka Umpung Athletic Sports and Cultural Club na ka bynta ban shna ia ka madan ialehkai phutbol ha ka shnong Umpung, 60 KM eiei na Mawkyrwat kaba hap hapoh ka Ranikor Civil Sub-Division, South West Ka Elaka Ri Khasi.

Ia kane ka pisa la bei lyngba ka Chief Minister Special Development Fund (CMSDF) 2023-24 haduh T.10 lak bad T.23.73 lak pat napoh ka CMSDF 2024-25 na ka bynta ban tei ia ki gallery bad ki jingker jong katei ka madan ialehkai phutbol. Haba kren ha kane ka sngi, u bah Marwein u la ong ba kum u nongmihkhmat ba dang samla bad uba ieid bha ban ialehkai sports, u la trei borbah na ka bynta ban pynbha ia ki jingdonkam jong ki jait jingialehkai bapher bapher na ka bynta ka jingmyntoi jong ki samla hapoh ka Constituency.

Kumta na ka liang u bah Marwein u la kyntu ïa ka Umpung Athletic Sports and Cultural Club, ka seng longkmie bad ki bor pynïaid shnong ka Umpung ba kin pyndonkam hok ïa katei ka pisa khnang ba kan long ka jingkyrkhu ïa ki samla ka shnong bad ka thaiñ baroh kawei. U Bah Pius u la ong ruh ba um da sngewkwah ban buh shwa da u mawnongrim na ka bynta kane ka jingtei, hynrei u da angnud eh ba ka jingtrei kan iaid shait shait bad ba un ioh plie ia kaba la dep trei.