Nga bynnud hynrei ka KSU kam kyrduh nongialam: Lambokstar

U President barim ka Khasi Students Union (KSU) u bah Lambokstarwell Marngar ula don 28 tylli ki snem ha ka KSU shwa ba un shongthait noh kum u nongialam ka seng.U bah Lambokstarwell ula ong ba ula rung sha ka KSU ha u snem 1998 bad ula don ha ka KSU la 28 snem kynthih ha kaba ula ioh shibun ki jinghikai ha ka KSU ban ieid bad shakri ia ka jaitbynriew. Ha ka jingdon ha ka seng, ula ong ba ka la don ka jingpyrshang ban iakhun ia ki jingeh jong ki samla, ka jingshong shngain ka ri bad ka jaitbynriew bad bunsien la shah pyntyrha ha kiba bun ki bynta.U la ong ba ka KSU ka dei ka shlem kaba ju don ka jingaiti pateng ia ki nongialam bad kam dei kaba kyrduh nongialam.

“Shisien pyrkhat ngi sngew bynnud hynrei ha ka KSU ka don ka por ia kaei kaei baroh. Ngi la iohi ia ki para kiba la ih ka rta, ki la biang ka kyrdan pule, ka jingnang jingstad bad ka skhem ruh ki tyrpeng jong ki ban tynrong ia ka kam,” ong u bah Lambokstar.Ka KSU kan sa kynjoh ia ka jingdap 50 snem sa tang ar snem bad ki nongialam ki leit ki wan hynrei na kawei ka samoi sha kawei pat, ka seng ka bteng ia ka jingtreikam. Ka Inner Liner Permit (ILP) ka dei ka mat kaba la rim bha hynrei ka dang dei ka mat ka ban buddien nangne shakhmat.Katba na ka liang u nongialam ba thymmai ka KSU u Samla Raymond Kharjana ula ai khublei ia ki nongialam barim kiba la ialam lynti naduh ka sngi ba ki don ha ka seng.

“Ka don ka jingbynnud hynrei ka don pat ka jingkren, ki nongialam ki leit ki wan, hynrei ka nongrim ka seng ka iaineh bad ka ieng skhem,” ong u samla Raymond.Ula ong ba ka seng ka la iaid lynti sha ki 48 tylli ki snem bad 16 tylli ki General election, hynrei kat dang iaid ki sngi ka seng kan nang khlain bad nang ioh bor na uwei u snem sha uwei pat. Kane kadei namar ka jingskhem nongrim jong uwei pa uwei u dkhot bad kyrmen ba ka seng kan nang iai khlain na ka jingdon ki samla kiba nud ban len lade na bynta ka daw bah ka ri bad ka jaidbynriew.“Ki ishu ki barim kiba ktah ia ka ri bad ka jaidbynriew, ngin nang iai pynjanai ban pynurong ia ki jingthmu jong ngi,” ula ong.