Nga shah ai ‘Yellow Card’ ha ka congress ba leit kynduh ia u Purno, ong u Prestone

Ka National Peoples Party (NPP) hynne rakhe burom ia ka lyngkhuh sngi iap ba 10 snem u (L) Purno Agitok Sangma u Nongseng ka NPP bad u Myntri Rangbah barim ka jylla. Ha kane ka sngi, u President ka NPP Meghalaya u Bah Prestone Tynsong ula buh syntiew ha u mot sah kynmaw jong u PA Sangma ha ka ophis treikam ka NPP ha Oakland, Shillong bad shim bynta da u James PK Sangma u khun jong u PA Sangma bad u Myntri Sorkar barim ka jylla, ki MLA, ki nongialam bad ki nongkitkam ka seng NPP bad la pynlong ia ka jingsngap jar ba shi minit kum ka dak ban kynmaw burom ia une nongialam ba radbah ka jylla bad ka ri. U Bah Prestone Tynsong ula ong, “Nga don ka jingiadei ba iajan bad u Purno Sangma naduh u snem 2014 bad haba nga leit sha Delhi, ngam ju klet ban phone ia u PA Sangma. Nga sah ha Maeghalaya House ha Aurangzeb Road bad u PA Sangma u sah hajan katei ka jaka bad ha ka por 8:30 ne 9 baje mynmiet bad nga shait leit sha iing ban iakynduh. Ha ka jingleit shongkai la don kiba phah ia ki jingtip sha ki nongialam ka seng Congress ha katei ka por bad phi tip nga lah ioh ka ‘Yellow Card’ ha katei ka por na ki nongialam ba halor ka seng Congress haduh ki nongialam ka jylla”.

 “U PA Sangma u nongialam ba la jied kyrpang u Blei bad phim lah ban mutdur ia ka rukom iathuh ne batai jong u ia kaba ngam lah ban klet. U la ong, Prestone phi long kum u para khatduh jong nga, trei shitom bad ai ba ngin pynthikna ka bha ka miat ki jaidbynriew riewlum da kaba sdang na Meghalaya, ka thain shatei lam mihngi bad ha ka ri baroh kawei ki dei ban ioh jingiada pura” ong u Bah Prestone bad ula bynrap, “Ha katei ka por ngam shym la sngewthuh namar nga dang mut ba ka dei tang ia ka jylla Meghalaya ia kaba ngan pynkut ka jingshakri hynrei ha ka jingiakynduh man ka por ka la pynkohnguh ia nga ba nga dei ban don bynta lang ha ka jingiohi jngai bad ka mishon ba la maitphang da une u nongialam bakhraw”. U la ong, ba ym ioh shuh ia u nongialam kat u PA Sangma bad ha ka jingiaid lynti jong u ha ka kam sain pyrthei um ioh shuh ia u nongialam ba khraw uba iohi jngai ia ka jingdonkam ki rit paid bad haba ula rung sha ka seng NPP ha u snem 2018 bad haba pule ia ka riti treikam ka NPP u iohi ia ka dur u PA Sangma bad ka khubor ba khraw ba ki ioh na une u radbah ka dei kawei ka thain shatei lammihngi bad ka jingitylli kawei ki jaidbynriew riewlum.

Katba u James PK Sangma ula pynpaw ia ka jingsngewnguh bad ai khublei ia baroh kiba wan shim bynta ban kynamw burom ia ka lyngkhuh sngi iap ba 10 snem u kpa jong u, u PA Sangma bad ula pynpaw ka jingsngewnguh ia baroh ki nongkren kiba la kren bad batai shaphang ka jingshem shimet jong ki bad u P.A Sangma.Katba u Treasurer ka NPP u Bah Daniel Thangkhiew ula ong ba u PA Sangma u long u nongiada ia ka jinglong tynrai jong ki jaidbynriew riewlum bad ia ka hok jong ki Khristan bad u dei u nongialam uba la ioh ia ka jingieid na kiba bun ki paidbah. “Ula iakhun na ka bynta ki Khristan ha kane ka ri, ula kob hapoh ka iingdorbar thawaiñ ka ri haba ki briew ki la kyntait ban kubur ia ka jingshisha ba ki skul kiba la pyniaid da ki mishonari bad ula phah da ka jingthoh sha u Myntri Rangbahduh ka ri bun sien halor ki mat ba ia dei bad ki khun shynrang bad kynthei Khristan ia kaba ki iai mad haduh mynta” la ong u Bah Daniel bad bynrap ka pyrthei baroh kawei ka tip ia ka jinglong u Purno Sangma ba iengskhem ban iakhun na bynta ka hok ki riewlum bad ki Khristan. Ha ka jingialang la ioh ruh ia ka jingkren na ka Kong Grace Mary Kharpuri, Bah Bajop Pyngrope, Dr Daniel Kharchandy uba la batai shaphang ka jingim jong u Purno A Sangma bad kiwei bad la pyniaid ia ka jingialang da u Dr Donkupar War.