Ngim pdiang ka Sohra ka ktem ki kam siew, na ka jingjia ki ar ngut shilok

Ka Hima Sohra ka la pynkhreh ban shna da ka polisi ban pyntreikam ha ka Hima bad ki shnong kiba hap ha ka Hima, na ka bynta ka jingshngain ki nongwankai bad ki nongshong shnong. Haba kren sha ki lad pathai khubor u Syiem Khynnah ka Hima Sohra u Paiem Maremdor Syiem, ula pynrem jur ruh halor ki jingkynnoh pynbudnam ki lad pathai khubor nabar ia ka thain Sohra. U Syiem khynnah ka Hima Sohra u Paiem Maremdor, ula ong ba ka jingjia ia ki shijur kiba jah rngai, ka long kaba sngewsih hynrei ban kynnoh ia ka Sohra kum ka ktem ki kam sniew, ka long ka bym lah ban pdiang.

“Ban shu kynnoh kam long kaba suk namar baroh shi tyllup ka pyrthei kiba wankai ha kane ka thain, ngi ju ioh ka khubor ba kadei ka jaka kaba shngain bad ki paidbah kane ka thain ki ju pdiang ia ki nongwan jngohkai da ka lynti akor ka burom namar ngi ju sngewthuh shai ba kane ka thain kam don lad don lynti lait na ka kam jngohkai kaba  dei ka pliang ja ka thain jong ngi,” ula ong. U la ong ba kane ka jingjia, kan ktah ia ka Hima bad ki nongshong shnong kiba im ja na ka kam jngohkai. Ula ong ba kane ka jingjia lahse kam dei ka sien kaba nyngkong namarkata ban tehlakam ia kum kine ki jingjia, ngin iatrielang bad ka sorkar na bynta ban thaw noh da ka polisi ryngkat ki kyndon khnang ban pyrkhing bad ban don ka jingshngain haba wan jngohkai ha kane ka thain.

Ha kajuh ka por, ula ong ba ka Hima kala pynkhreh ruh ban shna ia ka polisi ban pyntreikam ha ka Hima bad ki shnong kiba hap ha ka Hima, na ka bynta ka jingshngain ki nongwankai bad ki nongshong shnong. Lah ban kdew ba ar ngut ki shijur kynthup u Raja Raghuvanshi bad ka Sonam Raghuvanshi kila jah rngai naduh ka 23 tarik Jymmang 2025, hynrei ia ka met iap u shynrang la ioh na riat arliang ha thain Wei Sawdong katba dang wad ia ka Sonam. Halor ka jingshah shrah ka jaka ha Wei Sawdong na ka jingiakajia shnong hapdeng ka Laitduh bad Umblai, ka Hima kala shim khia ban pynbeit noh ia kane shen.

Leave a Reply

Your email address will not be published. Required fields are marked *