Nohshilliang ka mang pisa ïa ki skul sorkar ha ka jylla : MDC Mawthadraishan

U MDC ka Mawthadraishan uba dei ruh u Executive Member ka KHADC  u bah Powel Sohkhlet, ula kam ba ka jingmang pisa ka sorkar jylla ban pynbha ia ki skul sorkar ha ka jylla, ka long kaba noh shiliang hapdeng ki district.Haba kren sha ki lad pathai khubor, u bah Powel ula iathuh ba ka sorkar jylla lyngba ka tnad Directorate of School Education & Literacy (DSEL) ka la khot tender ban shna ban maramot ia 180 tylli ki Govt LP skul ha kane ka jylla. Ula ong ba katkum ka Tender na ki 180 tylli ki skul, 178 tylli ki dei ki Govt LP School bad kawei kadei ka Secondary School bad kawei kadei ka Higher Secondary School. U bah Powel ula ong ba kawei kawei ka skul LP la mang haduh 70.18 lak ban maramot ban shna pynbha ia ki iing skul. Katba na bynta ka Secondary bad Higher Secondary la mang 78.96 lak, lada khein kyllum ia kane baroh, kan poi sha ka 125 klur tam eiei. Ula ong ba ka long kaba sngewtynnad ba ka sorkar ka shimkhia ban pynbha ia ki skul, khmatam ia ki LP. Hynrei kane ka jingthmu  ka sorkar ban pynbha ia ki LP skul, ka long kaba leh shilliang namar ha Eastern West ki don tang 8 tylli ki skul kiba ioh ia ka pisa ban maramot.

Katkum ka jingong u bah Powel, na ki 180 tylli ki skul, ka Eastern West kaba don haduh 81 tylli ki govt skul ka sorkar ka mang tang ia ki 8 tylli ki skul. Katba ka West Garo ka ioh haduh 38 tylli, ka West Jaintia ka ioh haduh 29 tylli bad ka East khasi kaba dei ka district kaba kham heh ka ioh 19 tylli.“Katkum ka rekod ha Eastern West Khasi Hills, ki don haduh 81 tylli ki govt skul hynrei ka sorkar ka ai tang 8 tylli ki skul. Watla ki don bun ki skul kiba la jot bad pei. Kane ka rukom mang ka sorkar kam iaryngkat kum kiwei ki district,” ula ong. U la buh jingkylli kumno ka sorkar ha kiwei ki district ka mang haduh 38 tylli katba ha EWKH ka ai tang ia 8 tylli ki skul. Ula kyntu ia ka sorkar ba kadei ban peit lang kumjuh ia baroh ki skul . Ha kajuh ka por ula ong ba ha ki district ki don ki skul ha ki shnong, ba la seng da ki Shnong, Balang, kiba hap ha Deficit system bad kine ki ioh tang ka tulop na ka sorkar hynrei ka jingmaramot ki hap ban tip hi ia ka jinglut jingsep.

Ula ong haba ka sorkar ka don haduh katne klur ka ladei ban mang lang ia ki skul deficit bad Adhoc skul. Na ka liang u bah Powel ula ong ba 70 lak ban buh ban shna ia ka building jong ka Secondary bad UP  la lah bad kyntu ia ki nongpyniaid skul ba kidei ban peitngor, khnang ban kan ym don ka jingleh tang dep bad khnang ban pyntreikam hok ia kane ka 70 lak.