Palat 500 ki longiing bar Jylla lap ka HNYF, dawa ia u Sordar Hima Mawlong ban shimkhia

Ki nongialam ka Hynniewtrep National Youth Forum (HNYF) South East Sohra Circle hynne ka sngi ki la kynduh ia u Sordar ka Hima Mawlong ban phah shimkhia halor ka jingioh buhai shnong ki bar Jylla ha kane ka Hima kaba don ha khappud bad ka Ri Bangladesh. Ha Shwa kane na ka liang ki nongialam ka HNYF South East Sohra Circle ki la leit ban jurip ia ki katto katne ki shong khappud ha kaba ki la lap ba ki don haduh 500 tylli ki longiing jong ki bar jylla kiba wan buhai shnong hapoh  ka Hima, katba ki trai Jylla ki don tang 1%. Haba kren sha ki lad patahi khubor u Bah Banjop Khongwir ula iathuh ba hadien ka jingialang ba la pynlong bad u CEM ka KHADC, ki la leit ban jurip ia kine ki shnong ban lum jingkheiñ halor ka jingdon ki barjylla ha kine ki Hima.

U Bah Banjop ula iathuh ba ha ka shnong Lummuri ki don shiing ki dei jong ki jaitbynriew Hajong bad haduh 10 tylli ki dei ki longiing jong ki bar jylla, ha ka thaiñ Kalibari ki bar Jylla ki don haduh 130 longiing, ha Khaumrin ki don ki jaitbynriew Garo kiba don 173 longiing, ha ki thaiñ Diengkaiñ ki jaitbynriew hajong ki don 9 longiing bad ki bar jylla ki don 20 tam ki longiing katba ka Dhorambosti ki don 5 iing ki hajong bad ki bar jylla ki don 200 kane kaba hap ha Majai.Ula iathuh ruh ba ki la kynduh ruh ia u Sordar ka Elaka Mawlong ha kaba ki la kyntu ia u ban shimkhia halor ka jingioh buhai shnong ki bar Jylla ha kane ka Elaka Mawlong ha kaba u Sordar u la iathuh ba la sdang ban shim ia ka sorjamin khang ban lap ia ka jingdon ki bar jylla ki bym don kot ki sla ban ioh ban leh ia kaba donkam.

U Bah Banjop u la iathuh ruh ba ka jingioh buhai shnong ki briew bym dei ki Khasi ha kane ka thaiñ, kaba don ha khappud Bangladesh ka dei ruh namar ba ka Sorkar kam pat pyndep ban ker sainar shah ha kaba ki lah ban rung ban mih na kane ka jaka ban wan buhai shnong ha Lubiabari kaba hap ha Ichamati . Halor kane ka seng ka la kyntu ia u Sordar ka Elaka Mawlong ba u dei ban shimkhia ban tehlakam ia kane bad ruh ki la maham ruh ia ki briew bym dei ki trai jylla ba kim dei ban thied jaka ha kane ka thaiñ.