Phah dorkhas ka NPYF sha ka sorkar ban iakren bad ka sorkar pdeng ban shah tih Uranium

Ka National People Youth Front (NPYF) ka la leit ban aiti ia ka dorkhas sha u Myntri Rangbah ka jylla ban dawa ban tuklar ban iakren bad ka sorkar pdeng na bynta ban pyllait ia ka jylla na ka jingpynbna ba shah ban tih ia ki marpoh khyndew kum u Uranium, khlem donkam ban pynshai paidbah. Haba kren sha ki lad pathai khubor, u Working President ka NPYF u bah Bajop Pyngrope, ula ong ba ha ka 8 tarik Nailar, 2025 ka sorkar India lyngba ka tnad Ministry of Environment Forest & Climate Change (MoEFCC) ka la pynmih ia ka Office Memorandum (OM) ba shah ban tih ia ki marpoh Khyndew kum u Uranium, khlem da donkam shuh ban pynlong ia ka  jingsngap ne pynshai paidbah.

Ula ong ba ha kane ka OM, ka MoEFCC ka la pyllait ban tih ia ki marpoh khyndew kiba hap hapoh ka Part B (Atomic Minerals) bad part D (Critical and strategic minerals) jong ka Mines & Minerals (Development and Regulation), Act, khlem da donkam ban iasyllok ne iaphylliew jingmut bad ki paidbah nongshong shnong. Ula ong ba mynshwa kine ki projek ban tih Uranium ki donkam ban don ia ka jingpynshai paidbah ne ki Public hearing ha ki jaka kiba shah ktah khnang ba ki paidbah ki lah ban pynsngew ia ka sur jingeh jong ki, hynrei mynta lyngba kane ka OM la pyllait ban tih Uranium khlem da donkam shuh ban pynshai paidbah. U bah Bajop ula ong ba kane ka jingpynbna ka sorkar India ka buh jingma ia ka jylla Meghalaya namar kadei ka jylla kaba don ia u Uranium.

“ Kane ka mat ka sngewkhia bad kan ktah bha ym tang ia ka jylla Meghalaya, hynrei wat ia kiwei ki jylla riewlum ha India namar kine ki marpoh khyndew ki don bun ha ki jaka riewlum,” ula ong. Shuh shuh ula ong ba ha ka OM la iohi shai ba ia kane ka mat, ym shym la pyllait satia wat ia ki jaka kiba hap hapoh ka 6th Scheduled ruh watla kane ka jylla ka hap haduh 98 percent ki jaka hapoh ka Sixth Scheduled. “ Ngi sngewkhia ia kane ka OM ba la pynmih da ka sorkar India bad ngin sa buddien wat shaduh sha Delhi ruh khnang ban pyllait ia ka jylla jong ngi na kane ka jingpynbna,” ong u Working President ka NPYF.